JN gades namen Amen . Jck hartman scharpenbergh des Ersamen Rades to Luͤbeke dener Van gades / gnaden wolmechtich mynes lyues alle myner synne dancke(n) vnde reddelicheid , auertrachtende de ghe=/brekelicheid der mynschliken natuer(e) , dat wij alle des naturliken dodes sterue(n) moͤten , oͤfft ik denn(e) / na dem(e) willen gades van dem(e) dode voͤrkamende vnde vorwu(n)nen werde , Sette vnd(e) make darv(m)me tho / voͤrne dit myn Testament vnd(e) lesten willen van mynem(e) wollewu(n)nen gude dat my de almechtige / god voͤrlenth hefft to der ere godes , auermyddelst mynen nabeschre(ue)nn voͤrmuͤ(n)der(e)n na mynem(e) dode / to entrichtende alduͤsz , Jnterste beuele ik gade dem(e) almechtigen myne armen zele Jn voͤrbiddinge / marien der moder gades vnd(e) alle gades hilligen vnde gheue weghe vnd(e) stege tovoͤrbeter(e)nde eyne / marck luͤbesch , Jtem den armen elenden voͤrwiseden szeken to suͤnte Juͤrien voͤr Luͤbeke , To ghroͤ=/nouwe , tho parkentin , To moͤllen , To olde moͤllen , To odeslo , thor Swartouwe , to Trauemuͤ(n)de , gheue ik / In ene yewelike stede eyne marck luͤbesch eynem(e) yeweliken personen dar Jnne wesende syne(n) andel / rede in de hande to donde . vpp(e) dat se god voͤr my bidden , myner armen zele ghnedich vnde bar=/mehertich to wesende , Jtem den armen krancken luͤden thom(e) hilligen gheiste bynne(n) luͤbeke / vppe den bedden liggende gheue ik Jtlikem personen soesz penni(n)ge Jn de hand todonde vpp(e) dat se / god voͤr my bidden , Jtem to suͤnte katherinen to den ghrawen broͤder(e)n kese ik myne ghrafft vnd(e) / gheue dar(e)suͤluest voyftich mark lub(esch) , nemptliken vyffvndetwintich mark to erem(e) buwethe , / vnd(e) vyffvndetwintich mark tho erer vitallien , dar voͤr schoͤlen se my alle Jaer(e) eyns began / myt vigilien vnd(e) zelemissen so id woͤndlick is ere broͤder(e) tobegande , dar to schoͤlen se my=/ner dencken van dem(e) predickstoͤle , Jtem thor Eldena Jn dat Juncfrouwen closter ge=/ue ick teyn mark lub(esch) to erem(e) buwete vpp(e) dat se god truͤweliken voͤr myne armen zele bid=/den , Jtem to suͤnte Birgitten voͤr moͤllen geue ick to erem(e) buwete teyn marck , dat se god / bydden voͤr myne armen zele , Jtem so wil ik dat myne voͤrmuͤ(n)der(e) schoͤlen gheuen voͤr / voiftich marck scho vnd(e) cleder(e) armen nothtroͤfftighen hueszarmen vpp(e) dat se god vlitige(n) / bydden voͤr myne armen zele . Jtem noch schoͤlen myne voͤrmu(n)der(e) geuen voyftich mark lub(esch) / vyff armen Jüncfrouwen dat arme erlike vnberuͤchtede vrame Jüncfrouwen syn , se to eren / muͤ(n)digen vnd(e) manbar(e)n Jaren mede to beradende , vpp(e) dat se god bydden voͤr myne armen ze=/le , Jtem So sij witlik dat ick entfangen hebbe myt myner leuen hueszfrouwen Elzeben / myth vulborth vnd(e) willen erer voͤrmuͤ(n)der(e) . twevndetwintich hündert mark luͤb(esch) brudschat=/tes , de er myne voͤrmuͤ(n)der(e) wedderv(m)me tokeren vnd(e) geuen schoͤlen vth mynen redeste(n) ghuͤ=/der(e)n , dar to so totekene ik vnd(e) geue er veerhündert mark lub(esch) van mynem(e) wollewu(n)nen / ghude , dar to geue ik eer alle ere frouwelike cleder(e) vnd(e) clenode to erem(e) lyue denende / alze se nü yegenwardigen hefft , dar tho geue ik er alle myn Jngedoͤmete vnd(e) hueszghe=/rath bedde vnde beddewandt , kysten vnd(e) kystenwaer(e) myth aller tobehoͤringe nichtes buten=/bescheden(e) , vpp(e) dat se god den her(e)n truͤweliken voͤr my bidde , vnd(e) myner arme(n) zele dar van wath / ghudes na do , so ick eer des tobetruͤwe , vnd(e) wil dat se hir mede schall geschichtet afgesu(n)dert / vn(de) gescheden wesen van alle mynen ander(e)n nalatenen ghuͤder(e)n , Jtem mynen negesten / erue(n) der sy eyn , twe , edder meer , de sick dar to tuͤghen alze recht is , geue ik samentlikenn(e) / teyn Rynsche ghuͤlden , vnd(e) wil dat se dar mede schoͤlen geschichtet affghesünder(e)t vnd(e) ghe=/scheden wesen van alle myne(n) ander(e)n nalatene(n) guder(e)n , Jtem oͤfft ik wes meer voͤrge=/uende werde vnd(e) myne voͤrmuͤ(n)der(e) dat myth medewetende edder Jn Jegenwardicheid twyer / besetenne boͤrgher(e) schege , So wil ik dat sodane ghijffte Jn vuller macht geholden werden ghe=/lijck oͤfft se yeghenwardich Jn dessem(e) mynem(e) testamente begrepen wer(e)n , Jtem wa(n)ner / desse erghenanten ghiffte vnd(e) ghaue myt der bijghrafft so voͤrberoͤr(e)t alle voͤrvuͤllet synn / Allent wes dar denn(e) meer aver blijfft , dat schoͤlen myne voͤrmuͤ(n)der(e) voͤrkopen so se duͤrest / vnd(e) best koͤnen , de pe(n)nynge dar van kamende schoͤlen myne voͤrmuͤ(n)der(e) Jn de hande der arme(n) / keren bij penni(n)ghen , ok vigilien vnd(e) zelemissen dar van lesen lathen de wile dar van wat / is to troste vnd(e) salicheid myner armen zele , Ok wedderrope vnd(e) voͤrnichtige ik myth / dessem(e) Testamente , alle de Testamente de ik hijr beuor(e)n ghemaket hebbe , Myne voͤr=/mu(n)der(e) kese ik de beschedenne ma(n)ne Hinrick peperlinck , Diderick hüelscher vnd(e) Engel=/brecht bodinck , vnde wil dat myne erg(enanten) huesfrouwe gelijck mynen voͤrmuͤ(n)der(e)n Jn entrich=/tinge desses mynes Testamentes mede schal raden vnde daden vnd(e) geue eynem(e) yeweli=/ken eyne nobelen to früntliker dechtnisse , vnd(e) bidde dat se desset myn testamenth vnde / lesten willen doͤrch god entrichten So ick en des to beloͤue vnd(e) nemen dat loen van ghade , / Ock wil ick oefft erer welk Jn god voͤrsterüet dat denn(e) de leuendighen eynen vramen man / Jn des doden stede kesen so vaken des is behoff vnd(e) van noeden , Alle voͤrgeschreuen(e)n stuͦk=/ke püncte vnd(e) articule laue ick stede vaste vnd(e) vnvoͤrbraken toholdende so langhe ick de myt / leuendigher stemne witliken wedderrope , Jn tuͤchnisse der warheid is desser schrijffte / dree allensz lude(n)de , De gheschre(ue)nn syn , nha (cristi) vnses her(e)n gheborth , Düsent veerhündert / Jm(me) vyffvndeneghentighesten Jaer(e) , Am(me) daghe Ambrosii Epi(scopi) , Tuͤghe synth de Ersa=/men her(e)n , her hinrick van kaluen vnde her Anthonies dyman , Radtma(n)ne tho Luͤbeke /