Jn godes namen Amen . Jck Jacob westphall ghesunt an deme liue vnde wolmechtich al myner synne danken / vnde redelicheit . Auertrachtende dat nycht wyssers is wen de dot . vnde nycht vnwyssers wen de stunde des dodes . / hijr v(m)me oft ick van deme dode vorghekomen wurde . so sette vnde make ick nu to voren myn Testament vnde / latesten wyllen . van mynen wolgheuu(n)nen gude dorch god . van mynen suren arbeyde . my vorlent vnde vor=/woruen alse hijr na ghescreuen steit . Jnt erste weghe vnde stege to vorbeterende dar tho gheue ick viij s(chillingh) lub(esch) . / Jt(em) Jn dat Sekenhus to sunte Jurgen hijr vor lub(eke) . Jn dat sekenhus to gronouw . to Parkentyn . to tramu(n)de / vnde to darsouw Jn etlike stede geue ick iiij s(chillingh) lub(esch) . enen itteliken seken dar y(n)ne wesende synen deel dar van / in de hant to doende . dat se alle god den heren vor myne sele bydden . Jt(em) myne negesten eruen der sy danne / eyn twe edder mer de sick dar tho laten tugen als recht is . geue ick enen rynschen guld(en) . dar mede schollen se / gheschichtet vnde ghedelet wesen van alle mynen anderen nalatene(n) guderen beweghelick vnde vnbeweghelick / nychtes buten to bescheiden . Ite(m) Grusekoken vnde syner dochter katherinen mollers . vnde eren twen dochte=/ren geue ick samptliken to delende dortich marck lub(esch) . Ite(m) Taleken dryngenberges geue ick twyntich / marck lub(esch) . Dar mede schollen se samptliken vnde bysunderen gheschichtet vnde ghescheiden wesen van / alle mynen anderen nalatenen guderen nychtes buten bescheiden . Alle myne anderen naghelatenen / guderen wes der synt an schulden reden gelde retzschop husgherade kannen gropen ketele bedde bedde=/ghewant gheue ick vull vnde alle Jn dat Co(n)uent ofte susterhues su(n)te Augustyns orden by su(n)te ylien be=/legen Segenberges Conuent ghenompt . dat se god den heren vor myne . myner seligen husfrowen vnde my=/ner frunde sele truweliken bydden . Myne Testamentarie vnde vormu(n)dere kese ick de bescheidene(n) ma(n)ne / Joste karlebach . Hanse zedeler . vnde Diderick scluter . vnde gheue enen jwweliken ene marck lub(esch) to / fruntliker dechtnysse . dat se dyt myn Testament deste flitiger entrichten . dat lon van deme almech=/tigen gode dar vor to entfangende . Vnde wyl oft van den erbeno(m)pte(n) myne(n) Testamentarien jemant / vorstorue . dat denne de leuendigen enen vromen man in des doden stede wedderv(m)me kesen mogen . so / vake des noth vnde behoff werd synde so langhe dat dyt myn testament vnde lateste wylle sy ent=/richtet . Alle punte vnde articule vorg(enant) wyl Jck Jacob westphall erbenam(m)pt stede vaste vnde vnuor=/broken holden . so langhe ick myt leuendiger ste(m)me mu(n)tlike wederrope . Ghescreuen na (christi) ghebort vns(es) / heren . dusent verhundert seuenvndenegentich An deme achten daghe des werden hilgen lichans (christi) . / Tughe synt Her(e)n Hynrick van Caluen vnde Her Johan Hertze Radmanne der stad lubecke . /