WE . . Radmanne Nẏe vnde alt der stad tho helmestad bekennen opeliken an disseme breue Dat we vs vndersproken hebben mẏd vsen vruͦnden den buͦrghe(re)n von Halberstad / von Quedligbuͦrch vnde von . . Aschersleue(n) v̆mme ene were vnde huͦlpe , vnde sint my̆d ene ouer eẏn ghe komen , an disser wise . . were dat jemand se vor vnrechte(n) wuͦlde / eder vor vnrechtede he were we he were wanne se vs dat vore kuͦndegheden Deme en schuͦlde we mẏd jenigherleẏe vordernisse nicht behulpen wesen vnde schuͦlden . / recht vor se beden . vnde muͦghe we binnen achte daghen ene neẏnes rechtes helpen so schuͦlle we deme entseghen vnde schuͦlen ene behulpen wesen alse hir na steẏd bescre/uen also langhe want ene werde weder dan . , Tho deme ersten male . wanne se dat , von vs eschen vere daghe vore so schuͦlen we ene senden Dre man mẏd gleueẏen vnde / Twuene schuͦtten vnde schuͦlen sek irheuen in deme verden , daghe dar na also se ghe escheẏd sẏn vnde volghen vnde wanne de vif man to ene kome(n) so schuͦlen se ene gheue(n) / . kost . voder . vn(de) hofslach . ande(re)s en schuͦlen se ene neẏne pantquitinghe don . vnde we schuͦlen den sold gheue(n) , vnde neme(n) de vif man schaden eder vromen vppe deme / weghe vt vnde in , den schuͦlden se vnde we an beẏdent sẏden glike draghen vnde nemen . . Sunder wanne de suͦluen vif manne kome(n) bi de von Halb(e)r(stad) Quedligb(uͦrch) eder / van Aschersleue eder bi ere denere suar dat si . Neme(n) se dar schaden den schuͦle we suͦluen draghen . Neme(n) se ouer dar vrome(n) bi ene Dar schuͦle we vse mantal af neme(n) / Sunder neme(n) se vrome(n) an be name Des schuͦlen se neme(n) to der kokene wat se des behuͦnen . . wat dar bouene were Dat schuͦlden se vnde we an beẏdent sẏden / na mantale delen , vnde de vif man schuͦlen se bi sek behalden vere wekene aft se erer beduͦruen , bedoruen se ouer erer lengher Dat en schal nicht wesen et en sche mẏd vseme willen , , / vortmer . were dat se mer volkes , bedorften . so schuͦlde we ene senden to den beno(m)den vif manne(n) also vele dat se to samene hedden vefteẏn man Der schal wesen Teẏne mẏd / gleutẏen vnde vif schuͦtten , vnde de schuͦlden sek irheue(n) in deme achtende daghe . also se ghe escheẏd werden , vnde neme(n) se schaden eder vrome(n) Dat schal wesen in der wise / sam von den vif manne(n) vore steẏd bescreuen , vnde se schuͦlen ene gheuen . kost . voder . vn(de) hofslach ande(re)s en schuͦlen se ene neẏne pantquͦitinghe don , vnde we schuͦlen ene / den sold gheue(n) vnde se schuͦlen bi ene bliuͦen aft se erer bedoruen . also von den vif manne(n) vore steẏd bescreuen . . Echt vortmer . were Dat vse here von bru(n)swik vor / vnrechtede De buͦrghe(re) von Halb(e)r(stad) . von Quedligb(urch) eder von . Aschersleue so schuͦlde we vsen here(n) von bru(n)sw(ik) bidden vn(de) berichten Dar na binnen verteẏn nachten Dat / he von deme vnrechte lete . Vn(de) wuͦlde he ouer dor vser bede willen dar nicht anelaten so en schuͦlde we eme mẏd jenigerleẏe vordernisse to deme vnrechte nicht / behulpen wesen . . Echt were dat de buͦrghere von Halb(e)r(stad) von Quedli(n)gb(u)r(ch) eder von Aschersleue vmme disser verrede weghene also de steẏd na dissen Dren jaren jema(n)t / beschelden eder anverdighen wuͦlde Dorch huͦlpe willen De se vs ghe dan hebben Dat schuͦlde we Druweliken helpen weren gliker wis also de vorrede noch / stuͦnde . . Vortmer were Dat jemant voruested eder voruemet wuͦrde in dere vorbeno(m)den stede welkere vmme Rof . Mortbrand Duͦue . vor/retnisse eder des ghelik De schal mẏd vs in vser stad voruested vn(de) voruemed wesen gliker wis also to Halberst(ad) Quedligb(u)r(ch) eder to Aschersle(ue) / suenne se vs dat enbeden in ereme breue , vnde were Dat we ene bekenden so schuͦlde we ene hinderen laten wante an de buͦrghere De ene / vnder dissen vorscreuene(n) Dren steden welker ere dat were in der achte hedde(n) . In vser stad . Ane de De vses heren von brunswik broͮdede ghe/sinde sin . were Dat sek dere jenich irhelde an dissen vorbeno(m)den stuͦcken weder de buͦrghere von Halb(e)r(stad) Quedligb(u)r(ch) eder von Aschersleue vnde se vs dat / enbuͦden an ereme breue Dene schuͦle we bidden vnde berichten binnen de neghesten verteẏn nachten also se vs dat hebben to wetene dan Dat he ene dat / weder do . En kuͦnde se dar vser bede nicht an ghe neten Dat ene weder dan wuͦrde so schuͦlle we dat mẏd dene holden sam von deen anderen hir vore / steẏd bescreuen . . Ok so sẏ we to rade wuͦrden mẏd den von Gosler brunswik . Magdeb(u)r(ch) . vnde mẏd den von Halb(e)r(stad) Quedli(n)gb(u)r(ch) vn(de) von Aschersleue / Dat we schuͦlen kesen vnder eẏn ander vere man De schuͦlen dar to twen suenne des nod is , vn(de) sek dar to vorboden vnder eẏn andere vnde / schuͦlen des macht hebben to sprekene vmme der stede nod . vnde vortsetten . were ok dat Dii stede maneden vmme volghe so schuͦlden de vere man ok / macht hebben Dat se heten volghen Dar et ene bequeme duͦchte Dar men aller bilkest erst volghede sur is aller best nod were . vnde de wile dat men in / eẏner volghe is so en schal men neẏne ande(re) volghe eschen von jenigher disser vorbeno(m)den stede . vnde dere vere man schal eẏn wesen von Magdeb(u)r(ch) / vnde eẏn von Gosler vnde eÿn von bry(n)swik vnde Helmestad . vnde eẏn von Halb(e)r(stad) . Quedligb(u)r(ch) vnde von Aschersleue vt der Drier stede eẏn . / Disse vorrede vnde Dedinghe scholen stan duischen den dicke vorbeno(m)den steden . Halb(e)r(stad) . Quedligb(u)r(ch) vnde Aschersleue vnde vser stad von disseme / daghe an wante to sinte Michahelis daghe vnde schal waren von deme suͦluen sinte Michahelis daghe Dre jar vmme neẏst dar na ghende stede / vnde gantz also hir bouene steẏd bescreue(n) . . vppe eẏn orkuͦnde disser dinghe so hebbe we ene dissen bref ghe gheuen beuestened vnde besghelet ¹ / mẏd vser stad an hanghende Inghezeghele Na der bord goddes Dusend jar Dre hunderd jar jn deme eẏnen vn(de) veftighesten jare jn sinte Joh(ann)is / daghe baptisten to midden somere also he ghe horen ward . .