We Gheuehard vn(de) borchard bruͦde(re) Edelen van w(er)berghe . Ludolf van Alue(n)sleue sone jchteswanne Fritze(n) von Alue(n)sleue / vnde Rixe wedewe des suͦluen Fritzen dat eme god gnedich si mid vulbord vn(de) willen . Fritze(n) . Gheseken vn(de) Mette/ken miner kindere bekenne(n) opeliken in disseme breue dat ghe dedinghed is tuischen os vnde deme rade der / stad helmestad dat Rixe von Aluensleue vorbenomed schal vredesameliken besitten de wile se leued dene hof in / der stad helmest(ad) dene vse muͦne dat ere god gnedich si koft hadde mid eren pen(n)ighen dar de rad der stad helm(stad) / den vrede an heft vn(de) we nicht dest de suͦlue Rixe deme vorbeno(m)den rade to tincze gheue alle jar de wile se / leued dre schillinghe helmest(edescher) pen(n)ighe vppe de paschen vn(de) dre schillinghe vppe sinte Michahelis dach vnde vif / schillinghe to schote wanne des schotes tid is to helmest(ad) vnde verteghede haluen pen(n)ig to jowelkenne verndele / jares to wachte pen(n)ighen .. wanne ok der suͦluen Rixen to kord werd so schal de rad der stad helmest(ede) dene / suͦluen hof vor kuͦpen binne(n) iare vn(de) daghe dar de hof vmme vorkoft werd des schuͦllen se gheuen den verden teẏl / to deme buwe sinte steffan to helmestad vnde de ande(re)n dre teẏle schuͦllen se gheuen den juncvrowen de duͦchtere sin / der dicke vorbenomeden Rixen in deme klostere vppe sinte marien berghe bi helmest(ad) Tho eẏner bekantnisse / disser dink hebbe we vse jngheseghele ghe henghed laten an dissen bref Na der bord goddes dretteẏnhu(n)derd jar / jn deme enen vnde veftighesten jare jn sinte Gherderde daghe der heylighen juncvrowen