Ek cuͦrt von wendessuͦm be kenne openbare mit dessem breue / dat ik schuͤldich bin bartolde von werberghe borghere to helmstede / vnde sinen rechten eruen vnde we dissen bref heft mit erem / willen dre loͤdighe mark brunswikescher witte vnde wichte de ik / en be talen schal vnde wille in der stat to helmstede to dessem neghesten / to komenden paschen ane hinder vnde vortoch vnde an allerleẏe / arghelist to groͤterer wisneheẏt hebbe ik en to boͤrghen ghesat / langen borcharde von stenbeke vnde henninge von loͤuwinge dit / loue ik cuͦrt von wendessem vorghenoͤmet sakwoldighe vnde / lange borchart von stenbeke vnde henning von loͤuwig borghen / ok vorghenomet intruwen stede vnde vast to holdene ane hinder vnde vortoch ane inual ane huͤlperede vnde ane allerleẏe arghe/list vnde jo mit samder hant vnde dat dit stede vnde vast ghe/holden w(er)de be tuͤghe we mit vnsen anhange(n)den ingheseghelen / de we witliken vnde mit ghudem willen hebben ghe henget / laten an dessen bref de ghe gheuen js na der bort goddes dusent / jar vnde dre huͦndet jar in dem sesten vnde seuentighesten jare / in alle goddes hilghen daghe