We de rat . der stat to Helmstat olt vnde nige Bekennen opeliken in dissem breue vor / alle den de eyne seen vnde horn leẏsen . Dat we vorkoͮpen vnde vorkoft hebbe(n) witlike(n) / vnde mẏd ghudem willen Rickelen . Hen(n)ighes weẏdewin von dem gharden ses mark / to eẏrem liue . Veẏr mark vor vertich mark vn(de) de andern twe vor eẏre erue Der ses / mark schuͦlle we eẏre vnde willet dre gheẏue(n) vppe sinte Mich(a)el(is) daghe . de andern dre / vppe de pasche(n) . Vnde de ses mark schuͦlle(n) na eẏrem dode leẏdich vnd los weẏse(n) vnsem / hoͮuethern . sinte Stephin vnser parre Ok so schal dat erue na eẏrem dode weysen / sinte Stephens . Vor de vertich mark vnde eẏre erue schal se ok vri weẏse(n) . des / schotes . der wachte bi der muͦren . der wachte pen(n)i(n)ghe vnde der huͦde vor dem dore / Ok so hed se dat . bi vns beholde(n) dat se vor eẏre ander ghud nicht sweren darf touor=/schotende . wanne des wille we vns to eyre vorseen . vppe eyre vroͮmicheẏt . Des to ener / openbarliken bekantnisse . So hebbe we vorbenoͮmede rat . vnse jnghezeẏghel witlike(n) / ghehengh(et) laten an dissen bref . Ghegheẏue(n) vnde ghescreẏue(n) na goddes bort dretten/hundert jar jn dem Seyueden vnde seẏue(n)tighisten jare des mẏdweẏkins in den / paschen