Ek bartold von werberghe boͤrghere to helmstede be kenne openbare in dessem breue vor alle den de en / sen idder hoͤren lesen dat ik mid guͦder andacht vnde vordachtem muͦde hebbe op ghe laten vnde late op den / erwerdighen heren dem rade to helmstede den kamp de dar lit vor dem nordore bi dem wint moͤlen berghe vnde / tuͤt went an der stad grauen vnde enen kamp de dar tuͤd an der meghede dik beẏde kempe vri ledich vnde los / vnde wille en een recht were wesen wuͦr vnde wanne en des nod is vnde sette se in de were mit dessem / seluen breue vort mer so hebbe ik bartold vorghenoͤmet vnde abele min elike vrowe d gnade bi dem rade / beholden dat we der seluen vorbenomeden kempe vnde des rades lant dat dar lit jeghem dem nẏentorne / vnde tuͤt ander stad grauen altosemene bruͦken schuͤllen mit aller nuͦt vnde to behoͤringe alle vnse leuedage / vnde wen vnder vnser twen de leste sterft so schal dat vorbenoͤmende land vnde de beÿde kempe alto/semene von stuͦnd an gripen alzo it op den stuͤcken is mit aller nuͦt vnde tobehoͤringe vnde schullen von alle / minen eruen vnbededinget wesen vnde schal dem rade vnde der stad quid vri ledich vnde los wesen to / groͤterer wisneheẏt(en) dat dit stede vnde vast vnuorbroken ghe holden werde ane hinder vnde inval / ane huͤlpe rede vnde ane ienigherleye nẏe vuͦnde vnde an allerleye arghelist hebbe ik bartolt von / werghe dicke vorghenoͤmet min ingheseghel witliken vnde mit gudem willen vnde miner eruen vuͦl/bort ghe henget laten an dessen bref de ghegheuen is nach der bort goddes duͦsent iar vnde dre/huͦnder iar in dem vif vnde achtentighesten iare in der himmelvart daghe vnses heren ihesuͦ (cristi)