We adolf van speyghelberghe van der gnade goddes Abbet der stichte tho werden vnde tho sunte ludgere beleghe(n) vor helmestede / bekennen openbar jn dussem breue vor als weme dat vor vns syn ghe wesen vnse leue(n) ghetruwe(n) de rad tho helmestede / vnde hebben vns tho verstande gheuen wu Abbet Bruͤn van renneberghe vnse vorvare deme god gnade hebbe breue gheue(n) / den ghẏlden in vnser stad tho helmestede dar jchteswelke artikel jnne staͤn de vns vn(de) vnser stad vn(de) den ghemene(n) borgheren / nicht bequeme syn . besundern we eyne ghylde winne(n) wolde de scholde se soͤken tho dreͤn morghenspraken den artikel doͮ / we aͤff vnde erloͤuen vnde stedeghen dat . we eyne ghylde win(n)en wel de des werdich is so (?) schal me oͤme antworde(n) tho der / ersten rechte(n) morghe(n)sprake vmme sodane pen(n)ighe alze oͤme boren mach Vortmer de ghilde der smede vn(de) der scroͤdere jn / vnser stad welk ingheboren boͤrgher jn vnser stad tho helmestede de oͤre ghilde win(n)en wel de mach de win(n)en vmme de helfte / der pen(n)i(n)ghe dar se eyn viͤman¹ vmme win(n)en schoͤlde nach vtwisinghe orer breue des suluen ghelyk mach men ok winnen / dat line(n)werk Ok alze de line(n)weuere eyne nyge wyse hebb(e)n ghedacht in oͤre breue dat se yer leghen oͤre ghenoten alzet / wende de doch van aldere oͤre ghylde beseten hebb(e)n vnde noch besitten dat artikel doͮ we ok aff Vortmer weret dat / sek jemet erloͤue wedder vnse ghẏlde edder in vnsen ghilden tho helmestede dat were in der stad in dem nyge(n)markede / efte in dem oste(n)dorpe efte de ghilde jenich nÿge ghedichte setten² des deme rade duͮchte dat wedder vns vnse herscap / vnde de ghemene(n) stad were erloue we vnde bevelen vnsem rade vorscreue(n) dat se des nicht enstaden vnde wedder/spreken dar : vnde were ok dat in den nyge(n)marked edder in dat ostendorp woͤlden line(n)weuer toghen vnde wonen / der also vele wolde wesen dat dem rade daat duͮchte vnmoͤghelik syn dat moͤchte(n) se ok kore(n) vn(de) scolden des nicht stade(n) / wante an vns edder vnse nakoͤmelinghe vnde denne dat alzo tho voghene alze vns vn(de) dem rade vnde dem bleke dat / bequeme were Ok mach vnse rad dicke eerghena(n)t van vnser weghe(n) vn(de) vnser nakoͤmelinghe erloͤue(n) in vnsen nyge(n) / markede vor helmestede dat daͤr mach wonen eyn becker de brot veyle hebbe eyn smed vnde eyn scroͤder vnde neyne / meͤr dat schal wedder vnse ghilde in vnser stad nicht wesen alze dat van aldere beseten is ok enschullen alle vnser ghilde / breue de vnse vorvare(n) ghe gheue(n) hebben nicht verbroke(n) wesen med dussem breue [...]³ vtghenoͤmet dusse artikele in duͮs/sem breue vorbenoͤmed vnde des tho bekantnisse vnde groͤtter stedicheẏt hebbe we adolf van speẏghelberghe Abbet eerghe/noͤmed vnser ebdÿge jngheseghel witleke(n) vn(de) med ghudem willen ghehenghet laten aͤn dussen breeff Ok sint dusser / ser⁴ dingh tuͮghe Her Jan Hamersleue prouest tho sunte ludger vor helmestede her Enghelbrecht perner tho sunte stephen / dar sulues her Bernd perner tho weuelinghe lambert van segedinghe⁵ vnse ghetruwe vnde vele vromer lude den tho / loͤuene steẏd vnde dẏt is ghescheen na goddes bort jndem verteyn hunderdesten jare des sondaghes neghest vor / pinghesten wanne men singhet tho dem am(m)echte der missen exaudi domi(n)e