We de rad der stad to helmstede Beken(n)en openbar jn duͦssem breyue vor alle den de on seyn edder / hoͮren lesen dat de Erbarn he(re)n her Cord loyde vnde her hinrik nyestad kanoͮnike to vnser leue(n) vro=/wen to halberstad hebben gheantwert vnde ghedan Alheyde van onsleue de breyue de se hadden / van hern werner va(n) onsle(uen) erem brodere deme god gnedich sy vnde dar alheyd myt hern w(er)nere / vnde hern hinrike oren broͮdern an sam(m)ent jnne beleghen weren Dyt syn de breyue Twene breyue / van vnsem heren van halberstad Bischope Albrechte jn eynem syn se beleghen myt dem tegheden / ouer achteghedehalue hoyue oppe dem velde to berneberghe jn dem andern breyue syn se beleghe(n) / myt twen hoyuen oppe dem velde to Edekersle(uen) Vortmer drye breyue van dren ebbeden tho / werden vortmer eynen breyf van hildebrande van oͮuesuelde vnde were dat her hinrik van / onsleue erghena(n)t wedder hir to lande queme vnde de vorscreuen her Corde vnde hern hinrike / andeghedi(n)gen welde vm(m)e de breyue des scuͦlle we vnde willen se schadelos benemen vnde on / de breyue wedder antw(er)den wan se vns dat vorkundeghen dat se van hern hinrike van onsleue / dar vm(m)e anghedeghedinget werden desses to eyner bekantnisse vnde ope(n)barn bewisinge hebbe / we vnser stad jngheseghel witliken an dessen breyf Ghe he(n)ghet laten De gegheue(n) ys Na / Goddes bord verteynhundert jar jn de(me) dridden jare dar na des neghesten sun(n)aue(n)des vor / suͦnte juͦrgen daghe