Ek hans sunthusen marsschalk to wernigerode we borghemester / vnde Radman dar suluest enbyden juck Ersamen vorsichtige(n) borgemeste(re)n / vnde Radman(n)en to helmstidde vnsen fruntliken willigen denst allend / vnde doen juck openbar witlik vnde künth dat broder hans van walkentyde / an vns is gekome(n) vnde berichted dat he vm(m)e alles besten willen inguden / wolmenige mit den grauwen de denne vnses gnedigen heren van / Stolb(er)ge vnde vnse vigend sin ghewesen vnde nogh sin eynen gutliken / handel hebbe ghe had also dat he de wise hebbe gefunden dat de fryde¹ / der grauwe(n) halue(n) vnsem gnedigen heren vorg(enant) sine(r) gnade land vnde / lude gutliken schal stan twisschen duth vnde Sunte wolburghen daghe / nygest kome(n) den dagh al uth bynnen der tid der halue(n) eyn gutlik dagh / to beleghliker stidde moge bestym(m)eth vnde ghe holden werden vnde dar / up schullen de grauwen ore sake geladen hebben up juck mechtigh to sinde / vnde to entscheydenne so forde(rn) se des an juwe leue also van vns eynen / geleydes breff mogen krigen der geliken se van juwe Ersamicheyd vns / wedder vm(m)e willen geuen guden frunde also beyden we de sake ok wedder / vm(m)e up juwe Ersamicheyd in eyne(r) wtliken frunsschap effthe in rechte / to enscheydenne wis gi also derhalue(n) irkenne(n) schulle gi allend mechtigh / sin so forde(r) dat vns sodan(n)e breff van juwenth halue(n) de grauwen / weygen itzund In dussem yegenwordigen wedder vm(m)e ghesanth werde / vnde gi sodan(n)e scheyd van vns vnde ene willen an eynen dar up me / denne eynes dages berenne(n) mochte vnde den handel beseyken dehaluen / geuen we den grauwen alle twisschen duth vnde Sunte welborghen / dage eyn secker gud ghelyde also dat se bynne(n) der tid in vnses / gnedigen heren van stolb(er)ge lande in steyden vnde in dorpen veligh mogen / wande(r)n yn vnde uth so forde(r) dat se geleyde wedder vm(m)e holden dusses / to bekantnisse inguden truwen wel to holdenne hebbe ik hans van / sunthusen marsschalk to wernigerede we borgemeste(re) vnde Radman(n)e / dar suluest dussen breff witliken ghe geuen mit mynem hanses van / sunthusen jng(esegel) des we borgemeste(re) vnde Radman(n)e vorbenompt indussen / saken itzund midde gebruken ghedrucked up duth Spaciu(m) na (cristi) vnses / heren gebord dusenth vyrhunder(t) indeme sesse vnde achtigesten ya(r)e am(m)e / Sondage Reminisce(re) inder hilligen vasten