Wy Borgermester vnnd Radtmann der Stadt helmestede vnnd halberstedesches ghe stifftes Bekennen Jn dussem open breue vor vnsz / vnnd alszweme dat wy myt wetten¹ vnnd to stadinge des dorchluchtigen hochghebornn forsten vnnd heren heren Ernste artcze bisschopp / tho magdeborch primat(us) Jn germanie vnnd der halberstedeschen kercken admi(ni)strator hertoghe to Sasszen (et cetera) vnnd here(n) hinricke / desz Elderen tho Brunswigk vnnd luneborch herthoge vnsem gnedige(n) leue(n) heren Ok dorch vorderinge vele Jnniger criste(n) my(n)schen / mit almissen vor vnser Stadt helmestede achter deme lopensteyne eyn(n) Sekenhusz den arme(n) ghebreckliken mynschen vnde witleke(n) / to vorheghe vnnd to deme besten vnnd eyne Cappellen dar by gode Su(n)te anne(n) Sunte Jo(hanne)s vnde ere(n) medebenomede(n) patrone(n) Ok / alle godesz hillige(n) to ere(n) hebben late(n) uprichte(n) vnnd vth der grunndt ghebureth² vordert erliken dorch vnsen gnedige(n) here(n) va(n) halb(er)/stadt vycari(e)n hilliger vnnd ghewiget welker cappelan to deme ersten myt allem parrechte vnnd der altare opper Ok wes denne / deme preister effte der Cappellen vorwarer in rechte to kome(n) mach dar ouer wat in der cappellen ghe opperth vnnd ghegeuen werdt / dat up den altar nicht enku(m)meth schalme der Cappellen vnnd den arme(n) lude(n) to ghude hebben vnnd bruken na ordeneringe der / vorstender der ghemelten Cappellen vnnd Szekenhusz vnnd des vnghehinderth bliue(n) va(n) deme hebber des Cappelanes vnnd ok ande=/ren se in tyden werden vnnd kome(n) mochte dorch up weghe der priuilegien fryheit desz Closters to vnser leue(n) fruwe(n) berghe vor vnser / Stadt helmestede also na eynem openbarem Jnstrume(n)te dar ouer ghemaket is to bewisende Tho deme anderen male myt twen houe lan/des vppe deme honstede velde beleghen mit aller nüdt vnnd to behoringhe vth bewillinghe vnses gnedige(n) here(n) va(n) brunswigk dorch den / ghestrenghen Othraue(n) van velthem(e) vnnd sine(n) erue(n) fry denstes vnnd vmplicht vnnd wath van der eynen houe ku(m)meth schal de prester / hebben vnnd wath va(n) der anderen houe ku(m)meth schullen de arme(n) lude hebben Tho deme drudden male myt eyne(n) gulden Jarlike renthe / va(n) twintich gulden houeth geldes an eynem husze dar beneffen den fleisscherne(n) in vnser Stadt beleghe[n] an hans hoberghes huse twissche(n) / marten kocke vnnd Bartolomeus deme holschomeker in belegen dorch heyne(n) voghede vnseme medeborger ewich is bewedemeth beghiffte/get vnnd eynen halue(n) gulden va(n) vnseme Radthuse den de vorsichtige godeke olpken wonhafftich to rimstede de der sulue(n) Cappellen by / vns in de ere godesz vnnd der patrone(n) ghegeue(n) heft dat wy myt teyn gulden mogen afflosen vnnd bestellen by den eirghescreuen vor=/stendere(n) wedder to beleggende vnnd wy Radt upghenompt(e) sunder dusse cappellen velghenometh Jn craft dusses breues na der wise / eyner co(m)menden effte Comissen dar mede vor vns to beholdende der suluen Cappellan eynen frome(n) goidliken preister dohn to vorware(n)de / so vaken vns dat gud duncket vnnd dar nodt sin werdt vnde behoff dede sodan(ne) upghescr(euen) opper renthe vnnd wes dar noch to ghelecht / werdt an Jemandes Jnsage mane(n) vnnd upneme(n) vnnd Jnfryheit der goyder bruken schal vnnd mach des wy rade vorbenompt / vnnd vnse nakomelingen ohne vordernisse dohn werden vnnd bystant Sunder wy eirbenompt(e) Radt hebben de macht beholden an / dusser sulue(n) fundacien ift id keme dat dar Je(n)nich mynsche welde der Cappellen effte deme Sekenhuse den arme(n) luden wes to hulpe / geuen des schullen de vorstender der eirbeno(m)pt(en) cappellen vnnd sekenhuses mit vulborde des rades deme preister edder den / arme(n) luden to gude wur ohne dat best beleueth vnnd bequeme is vnnd dar schal de preister effte Cappellan der cappellen neyne / Jnsaghe effte wedder rede Jnne hebben wur vor dusse p(re)ster effte de cappellan vorwarer den arme(n) breckliken my(n)schen dar by wonhaftich / alle parrechte vnnd sacrame(n)te dede den suluige(n) van noden sin wan se des behoue(n) vnde begheren vth der cappellen mede deyle(n) schal / vnnd geue(n) dar to alle wecken twey missen to deme weynigesten eyne missen are benemi(n)ge echte nodt vpp watte dach he des Jnnicheit / heft to singe(n) effte to lesen mit deme bescheide de renthe sek vornne de sin arbeijte sik biwisen ok to vormerende vppe dusse vnse ordina(n)cie(n) / vnnd bevelinge odmodlichliken bidden vnnd begheren vnses gnedigeste(n) here(n) va(n) halb(er)stadt to stedinge bevestinge effte co(n)firma/cien dusses to bekanthnisse vnnd mehrer wissenheijt hebben wy vorghescr(euen) Borge(r)mester vnnd Rademan(ne) vnser Stadt Jngheseggell / lathen hanghen nedden an dussen breijff gheue(n) na Cristi gheborth vafteinhunderth Jar dar na jn deme anderen Jare am dage³ ad vincula / petrj