Ick Wolter van ẏttzeho beke(n)ne openbare in desser scrift . Dat ick den erbaren luden . den heren den Ratma(n)nen tuͦ Rozstock sculdich / bẏn . verteyn marck Rozstocker mvͦnte vor en pert . de verteyn marck scal ick en vnde wil bereden . tuͦschen desser tyd . / vnde dre weken . na su(n)the jacobes daghe . de neghest tuͦ kom(en)de is . bẏnnen der stat tuͦ Rozstock . myd reden pe(n)nighe(n) / were ock alzo . dat ick dyd vorsuͦmede . vn(de) se nicht enberedde edder nv(m)ment van mẏner weghen . alzo hyr ghe sproken is . / So schal alle de scult dar ick se v(m)me sculdeghe . vn(de) alle de rechtecheyt de ick myd en hebbe . de schal quyd . leddech vnd(e) / los wezen . vnde se dar nicht mer v(m)me tuͦ manenede . Vortmer is dat ghe deghedinghet . Weret dat id mẏ zvkedaghe / be neme edder ick ghevanghen worde . edder recht heren not . be neme . Dat ick be wysen mochte by(n)nen desser tẏd . / So scal ick alle mẏner sculdi(n)ghe vnd(e) alle mẏnes rechtes des ick mẏd en hebbe . myd allen di[n]ghen vnuorzvmet wezen . / ock so . is id ghe sproken . twischen vns . Weret dat ick storue edder ghe slaghen worde by(n)nen desser tẏd . vnde dat en . / ere ghelt nicht en worde . So scholen myne erfnamen nodlos syn . van der mani(n)ghe v(m)me desse vorsprokenen verteyn=/marck . vnde mẏne erfnamen scolen ok der Ratma(n)ne nernemer v(m)me manen . Tuͦ ener groteren bethuginghe desser / dink . hebbe ick myn Inghezegel henghet vor dessen bref . De gheuen vnde screuen is tuͦ Rozstock . na godes bort . / druͦtteynhuͦndert iar . i(n) deme Souen vnde sostegesten iare in sunte Joha(n)nes auende baptisten . De tughe alle(r) desser stuͦcke syn . desse erlyken lude . gherhardus Westfal . lambrecht stenwerck . he(n)neke van dorsten . vnde / he(n)neke pape borghere tuͦ Rozstock . vn(de) dar tuͦ vele ander lude deze tughes wert sẏn . . . /