Wy Albert van godes gnaden hertoghe toͮ mekelenborgh creue toͮ zwerin toͮ stargard(en) vnde toͮ / rozstock here bekennen vnde bethuͮghen openbar mit dessem breue . dat vse leuen borghermestere / vnde raetmanne vser stad toͮ rozstock dor vser bede vnde vser leue willen vs vnde vsen eruen / hebben alrede toͮvorn volghedaen vmb ere orbør des enen Jares dat alder erst kumpt na den / Jaren de wẏ vsen leuen Johan kalen raetmanne toͮ rozstock vp vse orbør beseghelt hebben . vnd / hebben vs vor dat sulue Jar gheghulden van der vorscreuen orbør weghen dordehalf hundert roz=/stocker mark . vnde hebben vs daer bouen gheantwardet vnde gheghulden vẏftich rozstocker mark / de wẏ en scolen vnd(e) willen afflaen van der orbør der vorbenomeden stad deß Jares dat na dem / vorscreuenen enen Jare alder erst volghet vnde laten vor vs vnde vor al vse eruen de vorbenom(eden) / borgermestere vnde raetmanne vnde de menheit vser vorbenom(eden) stad toͮ rozstock vnde ere nakomelinghe / der vorscreuen dordehalfhundert mark vor dat ene Jar . vnde der vẏftich mark vor dat andere Jar / quit leddich vn(de) los indessem breue . dar wẏ toͮ tuͦghe vse jngheseghel anghehenghet hebben. de / gheuen is na godes bord drutteynhundert Jar in dem souenteghestem Jare in sunte mẏcheles daghe / hir hebben ouer wesen tho tuͦghe vse triͦwen raetgheuen . marquard prouest toͮ rene clawes alkuͮn / vse kamermester vnde Johannes swalenbergh vse kenceleer . / 1370 in die michaelis