Witlik sij dat desse na scr(euene) articule v(m)me bede willen der olderlude des amptes der / wullenweue(re) vth den steden lubeke hamborgh Rozstok Stralessunde wism(er) / vnde luneborg van deme Rade sint togelaten vnde stan uppe desser vorben(omeden) stede / vnde Rede vorbeterent wenner se willen /

Jnt erste dat nẏment bynnen dessen steden lubeke hamborg Rozstok Stralessu(n)t / wismer vnde luneborg schal holden jengen knapen de myt vnwillen van / sineme meystere dar he touoren mede denet hadde gescheden were dat sij bynnen edder buten der vorhuͮre Sunder id en were dat de knape des Amptes / vn(de) sines meysters willen dar he mit vnwillen van gescheden were gemaket hadde /

Jt(em) schal nẏment deme anderen sine knapen enen edder mer entmeden ofte / entspanen . entmeden ofte entspanen laten myt jenigen vorworden bynnen / edder buten dessen vorben(omeden) steden /

Jt(em) weret ok dat jenich knape dende in dessen vorben(omeden) steden vnde mit vnwille(n) / van sineme meystere schedede vnde denne v(m)me des vnwillen jn eyn velt/kloster ofte jenige clene stede edder wicbelde to denende toghe . den knape(n) / schal na der tid nyment meden edder holden er der tid de knape des jennen / dar van he mit vnwillen togen is willen gemaket heft /

Jt(em) weret ok dat jenich knape bynnen der tid der vorhure sineme / meystere jenige dage vorsumede to arbeydende sunder reddelke notsake / denne mach em sin meyster vor enen jewelken dach afkorten enen lub(eschen) S(chilling) jn vormy(n)ringe siner vorhure . /