Ik johan bereke borgher to rozstock bekenne vor my vnde myne eruen vnde doͮ witlik allen lꞹden . de dessen yeghenwardeghen bref seen . edder / høren lesen . vnde betꞹghe øpenbare in desser scrift dat ik mẏt vulbort Elzeben myner husurowen . vnde alle erer neghesten vrꞹnde . mit wol be/radenen moͮde hebbe vorkoft vnde ghelaten vnde vorkøpe vnde late in desseme yeghenwardeghen breue . den erbaren mannen Borghermesteren / vnde Ratma(n)nen der stat to Rozstock vnde eren nakomelinghen in deme suluen rade vnde den borgheren to rozstock Teyndehalue hoͮue(n) in deme / dorpe ryctalendorpe also alse se lygghen in allen enden erer schede mit allen eren tobehorynghen mit aller nut , mit aller bede mit alleme denste . / it sy perde denst . waghen denst . edder wo de denst ghenomet sy . mit alleme rechte vnde rechtecheyt . mit alleme eghendoͮme . vnde vryheyt . also alse / it werneke witte borgher to rozstock , wandaghes elyken man Elzeben miner husurowen vorbenømet van her johanne van deme bomgarden wanda=/ghes borghermestere to rozstock alder vrẏgest to pande ghehat vnde beseten heft vnde mit der lenware ener vicarie . de de vorbenomde her johan / van deme bomgarden in dat sulue gud ghemaket vnde ghelecht heft vnde mit alle deme rechte alse it my Johan bereken vorbenomet myt / myner husurowen Elzeben vorbenomet na deme dode eres mannes . wandaghes werneken witten in rechteme erue to gheuallen is . vor drehun=/dert mark rozstocker pe(n)nynghe . de se mẏ wol to danke vnde nꞹghaftighen beret vnde betalet hebben . vryelken vnde vredesamelken to eweghe(n) / tyden to hebbende vnde to besittende dat vorbenomde gud mit allen vorscreuenen vnderschedynghen sunder myne vnde myner erue(n) vnde vrunde / bewernisse vnde hinder . also vrẏ . alse it her johan van deme bomgarden guder dechtnisse to voren van den heren van deme lande vnde werneke / witte vnde ik dar na alder vrygest vnde vredesamelkest ye ghehat vnde beseten heft vnde hebben . vnde scullen aller breue de vppe dat vorben(omede)¹ / gud to rictalendorpe ghemaket gheuen vnde sprekende synt to behoef der stat to rozstock to eweghen tyden in aller mechticheẏt brukende / wesen in aller mate vnde wise alze werneke witte eft he leuede . Edder ik vnde Elzebe myn husurowe vorbenomet vnde mẏne eruen der suluen / breue bruken mochten . vnde hebbe des to tꞹghe myn ynghezeghel henghet laten an dessen yeghenwardeghen bref . de gheuen vnde screuen is / to Rozstock na Godes bort drutteynhundert iar in deme sos vnde achtenteghesten iare in sunte nycolaus daghe des hilghen bisscoppes /