In Godes namen amen . Ik ta(m)me myre(n)dorp sone . ludeke sẏn vader . hinr(ic) vn(de) he(n)neke . ok sẏne sones . bekennen / vn(de) betugen . ope(n)bare i(n) dessem breue . vor al den ghenen de en seen edd(er) horen lesen . dat wi mit guden vrẏen willen . wete(n)/de vn(de) vnbedrungen . vor vs vn(de) vor vse eruen boren vn(de) vngeboren louet hebbe(n) . vn(de) loue(n) in dess(em) b(re)ue . den Erbare(n) ma(n)nen . / borg(er)mestere(n) . Radma(n)ne(n) to Rozst(ok) vn(de) ere(n) nakomely(n)gen i(n) dem sulue(n) rade . borgere(n) vn(de) menheit . ene Ewige stede orueyde / vn(de) hebben dar to mit vpperichteden . vyngeren i(n) den hilgen sworen . dat wi vn(de) vse erue(n) . boren vn(de) vngeboren . nu(m)mer / to Ewigen tyden . new(er) mit rume new(er) mit Rade . . stilleken edd(er) ope(n)bare bi vs edd(er) andere(n) luden . saken willen vn(de) / scholen . . yenig(er)leie wis vppe de schicht de an ta(m)me myre(n)dorp geschen is also . dat he in der stad slote to Rozstok gesett(et) . / vn(de) holden wart v(m)me Rof den he den eren dan hadde . dar an de vorb(enomede) rad gnade bi dede . vn(de) wi laten se vn(de) alle / de gene . dar des wes ane is vn(de) wesen mach i(n) tokome(n)de(n) tyde(n) . aller veyde vn(de) sake efte wi yenighe hadde(n) edd(er) hebb(e)n / mochten quid leddich vn(de) los . alle desse vorscr(euen) stucke stede vast . vn(de) vmbrekelik to holde(n)de . lowe wi alse ta(m)me sone / vor mẏ vn(de) myne erue(n) ludeke sẏn vad(er) hinr(ic) vn(de) he(n)neke ok sẏnes sones vor vs vn(de) vse erue(n) bore(n) vn(de) vngeboren mit / en(er) same(n)de hand vn(de) mit vsen medelouere(n) vn(de) wy mit vsen erue(n) . alse cord hasenuore h(er)ma(nn) stolle cla(us) zelege Joha(n) / Bulle . radma(n)ne to teterow Jacob gysenbergh borg(er) to Rozstok mit en(er) same(n)de hand su(n)d(er) yenig(er)leie hulperede vn(de) argelist / des to beka(n)tnisse vn(de) grøt(er) bewari(n)ge so hebbe wi medelouere vorben(omet) vse i(n)gezegele mit willen vn(de) witscop heng(et) vor / dess(en) bref . Gheue(n) vn(de) screue(n) to Rozstok na Godes bord drutteynhu(n)dert Jn deme negene vn(de) achte(n)tigesten iare Jn / deme aue(n)de der he(m)meluard vses heren . /