Jk lẏppold holste knape be kenne vnd(e) betuͦghe openbare jn dessen breue . vor allen guden luͦden / de ene zeen eft høren lezen dat ik mẏt mynen rechten erfnamen van rechter schult schuͦldich / bẏn deme be scheydene manne hern wẏnold bagghelen Raetman to rozstoke vnde sẏnen rechten / erfnamen vertich marc luͦbescher pe(n)ni(n)ghe vor dyt vorbenuͦmede ghelt zo zette ik eme / to enen bruͦcliken pande dat zulue gud dat ik myt mẏnen wẏue nam dat beleghen is to / retze myt alle syne(n) thobehøringhen , alsuͦlk alse ik dat dar hebbe vnd(e) ik vnd(e) myn erfnamen / møghe(n) dat zuͦlue gud wedder løzen bẏnnen dren jaren alse nuͮ neghest to kompt to suͦnte / mertens daghe vort ouer dren jaren alse vor vertich m(a)r(c) lub(esch) . were dat ik des nicht / en løzede bẏnnen desser tẏt alse vorscreuen is so schal dat zuͦlue vorben(omede) gud hern wy/nold bagghelen rechte eweghe kofte kop wesen vnd(e) syner rechten erfnamen vnd(e) ik lyppolt / vorben(omet) mẏt mẏnen erfnamen scholen eme des vorben(omeden) gudes waren vor alle ansprake / gheistlik vnd(e) werlik vor alle de(n) jenen de vor recht komen willen recht gheuen vn(de) neme(n) / willen vnd(e) schal eme dat gud vor laten vor den heren des landes wen hern wynold / edder syne erfnamen des van mẏ edder van mẏnen erfnamen be gherende synt dat / rede vn(de) loue ik lyppold holste mẏt mẏnen erfnamen deme vorben(omeden) hern wynold bagghelen / vn(de) sẏnen rechten erfnamen in guden truͦwen stede vnd(e) vast to holdende zunder claghe / vortoch vnd(e) jengherleẏe arghelist to mereren be kantnisse des hebbe ik lẏppold holste / myn jnghezeghel ghehenghet an dessen bref vnd(e) tho tuͦghe so hebben desse guden lude / alse clawes kerktorp knape hinrik Constyn vnd(e) hans korte ere jnghezeghele mẏt mẏ / ghehenghet an dessen de gheuen js to rozstok na godes bort druͦtteynhundert jar jn / de(m) negenttichesten iare des mẏddeweken na alle godes hilghen daghe /