Ik werneke linxstow to mamerow knape beke(n)ne vn(de) betuͦghe openba(r)e in dessem b(re)ue vor alle de(n) jene(n) de ene zeen edder hore(n) leze(n) dat ik na rade myd wille(n) / vn(de) vulbort olde hinrik zeleghe(n) to kerckghetze ju(n)ge hinrik zeleghe to deme hintze(n)haghen he(n)neke zeleghen to lubbetze vn(de) curd zeleghe(n) vn(de) erer erue(n) hebbe / vor zettet vn(de) vorlate(n) vorlate vnde zette noch in desseme breue deme erlike(n) ma(n)ne her winolt baggele(n) Ratma(n)ne to rozstok vn(de) zine(n) rechte(n) eruen / twintich m(a)rk gheldes rozstocker pe(n)ni(n)ge jarliker rente . Jn beyde(n) dorpe(n) to wendesschen retze vn(de) to dudessche(n) retze alze to we(n)dessche(n) retze jn der / zomerbede drutteyn schillinge lubesch . vortmer myd hintzeke gherdes . vn(de) myd tẏdeke Smede dordehalue m(a)rk rozstocker pe(n)ni(n)ge vortmer jn deme / dudesche(n) dorpe to retze mẏd eggarde myt ottelyne vn(de) mẏd clawes lubbe(n) vefteẏn m(a)rk rozstocker pe(n)ni(n)ge vn(de) twe schillinge vortmer myd den / vorbenomede(n) tẏdeke gherdes vn(de) mẏd smede teẏn schillinge lubesch dit vorbenomede ghelt schal her winolt vn(de) zine erue(n) alle jar vpbore(n) va(n) desse(n) / vorscreuene(n) lude(n) vn(de) van ere(n) nakomelingen vor twe hundert m(a)rk de vs her winolt rede lenet vn(de) tellet heft vn(de) her winolt vn(de) zine eruen / schole(n) desses ghudes vredezamelke(n) bruken bezitte(n) vn(de) hebbe(n) myd alleme rechte vn(de) denste vn(de) menlike(n) myd aller tobehoringe myd aller nud / vnde bruklickheit myd honren vn(de) myd vlasse edder wo de tobehoringe nomet zẏ mẏd aller vrẏgheit vn(de) alze vrig alze id de zeleghe(n) is aller vriest / bezete(n) vn(de) hat hebbet vn(de) altesnicht vt ghenome(n) dat den zeleghe(n) vromelike mochte wezen ane de lozinge were ok dat got vorbede dat her / winolde vnde zine(n) erue(n) des behof vnde noͤt were zo mach he by zik zulue(n) by zine(n) vru(n)de(n) edder by zine(n) knechte(n) pande(n) late(n) wo vakene vn(de) / wo dicke eme des behoͤf vn(de) noit is zunder broke vn(de) mach de pande driue(n) vlote(n) efte vore(n) vppe eyne stede wor id en euenst kuͦmpt vn(de) / mede vare(n) alze mẏd vor volghede(n) pande(n) de in alleme rechte vorvolghet zint vnde wi werneke olde hinrik ju(n)ge hinrik he(n)neke vn(de) curd ghe/hete(n) zeleghe(n) vn(de) vse erue(n) schole(n) vn(de) wille(n) her winolde vn(de) zine(n) erue(n) des ghudes ware(n) vn(de) vntvrien vor alle ansprake beẏde an ghestlike(n) rech/te edder an werlike(n) . vn(de) scholet edder willet desses vorbenomede(n) ghudes . neme(n)de anders zette(n) edder vorkopen eͤr her winolt vn(de) zine erue(n) / ghenomet zint va(n) schult vn(de) van schade(n) to ziner noghe zunder arch were ok dat her winolde edder zine(n) erue(n) borste efte brake worde / an houͮetsu(m)me(n) edder an rente zo schole wi en vul to don vte vseme redeste(n) ghude wor wi dat hebbet alle desse vorscreue(n) stucke stede vn(de) vast / to holdende vor alle weddersprake vn(de) zunder arghelist dat louͮe wi werneke linstow olde hinrik zeleghe ju(n)ge hinrik zeleghe he(n)neke zeleghe / vn(de) curd zeleghe mẏd vsen erue(n) mẏd eẏner zamede(n) hant her winolt baggele(n) vn(de) zine(n) rechte(n) erue(n) to eẏner hoghere(n) betuchnisse zo hebbe / wi vse inghezeghele vor desse(n) bref ghehenghet dede gheue(n) vn(de) screue(n) is to Rozstock na godes bort drutteẏnhundert Jar Jn deme een vn(de) neghe(n)/tegheste(n) Jare Jn zu(n)te thomazes auende /