Ik johan schulte munter bekenne vnde betughe openbare jn desseme breue vor alle den ghenen de Ene zeen edder horen lezen . dat ik myt / wolberadene(m) mode myt vulbord vnde na Rade myner Eruen vnde negesten vru(n)d hebbe rekkelken vn(de) reddelken zetted vn(de) late(n) vn(de) zette vn(de) / late jn desser scrift deme erbaren ma(n)ne hern bertold kerkhoue Radma(n)ne to Rozstok vnde syne(n) rechte(n) eruen twe vndetwintich mark vn(de) achteyn penny(n)ge jarliker renthe Rozsteker pennynge vor dordehalfhundert mark der sulue(n) mꞹ(n)the de my an reden telleden ghuden pennynge(n) to / dancke wol bered synt jn myme dordendele des dorpes to mønnykehage(n) van den nascreuene(n) buren dar sulues . Ere(n) erue(n) vn(de) nakomelingen / van ere(n) høuen huͦuen vnde van alle(n) ere(n) tobehoringe(n) . alse van hermen kulema(n) twelf mark rozsteker pe(n)nynge van Clawes hogher teyn mark / vn(de) achteyn pe(n)nynge der suluen mu(n)the alle Jar to sunthe mertens daghe vryelken vn(de) vredesamelken vp toborende by hern berthold kerkhoue / vorben(omet) edder syne(n) Erue(n) were øuer dat hern bertholde edder syne(n) Eruen erb(e)n(omet) Jenich borst edder brake worde i(n) den vorscreuene(n) twe vn(de)twintich / marken vn(de) achteyn pe(n)ninge(n) iarliker renthe so moghen se vn(de) scholen . de suluen twe vn(de) twintich mark vn(de) achteyn pennynge renthe In alle(n) / tobehørynge(n) mynes dørdendeles des dorpes to mø(n)nykehagen(e) vorb(e)n(omet) alse id licht vn(de) van oldinges geleͦgen heft Jn allen enden syner schede . / sunder yenigerleye hinder vnde bewernisse vpbøren vnde entfande . . Vortmer mach her bertold kerkhof vn(de) syne Erue(n) by erer egene(n) macht / myt Eren vrꞹnden wanne vn(de) wo dicke en des nod is de dickebenomede(n) twe vn(de) twintich mark vn(de) achteyn pe(n)nynge renthe panden vte / den erb(e)n(omeden) bure(n) edder ere(n) nakomelinge(n) alse herme(n) kulema(n) vn(de) Clawes heger vte eren houen vn(de) huͦuen vte vn(de) vte myme gantze(n) dor=/dendele des dorpes to mønnykehagen(e) vn(de) vte alle syne(n) tobehoringe(n) . Vnde møge(n) de pande dryue(n) vlotten vn vøren bynne(n) vnses here(n) / lande to Mekelenborgh i(n) en slot dar id en euenst kꞹ(m)pt vnde de pande vorkøpen Ere pe(n)nynge dar mede to neme(n)de sunder broke / Vortmer her bertold kerkhof vn(de) syne erue(n) hebben gancze vulkomene macht desse vorscreuene twe vn(de) twintich mark vn(de) achteyn pe(n)=/nynge renthe to vorsettende to vorpandende geistlike(n) edder werltlike(n) p(er)sone(n) vor de Erbenomeden su(m)me gheldes vn(de) den se dat setten / Edder vorpanden schal desse iegenwardige bref hulplik vn(de) bruklik wesen . like en sꞹlue(n) wo de losinge my vn(de) myne(n) erue(n) beholden / blyue(n) . Ok heft her bertold vn(de) syne erue(n) my vnde myne(n) Erue(n) des ge ghund dat wi de dickebenomede(n) twe vn(de) twintich mark renthe / vn(de) achteyn pe(n)nynge vppe sꞹnthe mertens dagh wenne wi dat vortbrynge(n) køne(n) vor de Erbenømede(n) su(m)men gheldes wedder løsen møge(n) / de losinge en half iar vppe sꞹnte merte(n)s dagh her bertolde vn(de) syne(n) Erue(n) to vore(n) to kꞹ(n)degende vn(de) en denne de druddehalfhundert . / mark myt der renthe myt ghuden pennynge(n) de to Rozstoke ghenge vn(de) gheue synt vn(de) dar sꞹlues bedderue(n) luden vul mede don mach / To dancke in Ener su(m)men wol tobetalende . were ok dat de Erue(n) henneke(n) vnde gherwe(n) wilden de my dyt vorscreuen dørdendel to / . mo(n)nekehagen(e) vorkoft hebben wedder koften vor søs hundert mark de en schal ik edder myne erue(n) nicht vpbore(n) eͤr wi her ber=/tolde vn(de) syne(n) erue(n) de dørdehalfhundert mark vn(de) de renthe vorscreue(n) ganczliken to dancke entwore(n) hebben . Alle desse vor=/screuen(e) stucke vn(de) en iewelik bẏ zik . loue ik iohan schulte erbenomed myt myne(n) erue(n) hern berthold kerkhoue vn(de) syne(n) erue(n) / stede vast vn(de) vnbrekelik toholdende sunder argelist . To bekantnisse vn(de) grøterer bewaringe hebbe ik iohan schulte vorb(e)n(omet) myn / Jngesegel myt den Jngesegele(n) der Erbare(n) lude hern ioha(n)nis van der aa hern hinric witte(n) vn(de) winold baggele(n) borgermest(er)e to Roz/stok georgi(us) kreuetstorp vn(de) ølrik grullen borgher(e) dar sꞹlues de hir to tꞹchnisse iegenwordich were(n) . wetendes henged vor dessen bref / de gheue(n) vnde screue(n) is to Rozstok na godes bord drutteynhundert Jar Jn deme dre vn(de) negentegeste(n) Jare des mandages na sꞹnthe / vitus daghe des hilgen merteleres . /