Jk hinrik vnde myn sone allexius geheten valkenhagene . knapen . wonaftich in deme houe to Conesse . mid vsen rechten erue(n) beke(n)nen / vn(de) betugen openbare in dess(em) iegenwardigen breue vor allen luden de ene zen edd(er) horen lesen . dat wi vorlaten vn(de) vplaten / in dess(er) iegenwardigen scrift . der erliken vrowen vor greten ener wedewen hern arndes van gu(m)meren . deme god gue/dich si . eren kinderen vn(de) eren rechten eruen . to ende . veftich mark Rozstoker pe(n)ni(n)ge . de vs vn(de) vsen eruen . tokomen / vormiddest deme dode . vor greten wendelstorpes . ener ju(n)curowen in deme Closter des hilgen Cruces bi(n)ne(n) Rozstok / belegen . de me denne entrichten scal vte deme dorpe to der Stuͮtowe . vs vsen eruen . edd(er) ieme(n)de de van vser wegen / dar vpsaken moge . in den veftich marken vorb(enomed) nichtesnicht beholdende . alle desse stucke vorb(enomed) . loue wi hinr(i)k vn(de) allex(ius) / vorb(enomed) mid vsen erue(n) vor Greten vorben(omed) . eren kinderen . vn(de) eren rechten eruen . stede vn(de) vast to holdende . sunder / hinder weddersprake vn(de) alle argh . in guden truwen . vn(de) des to tuge . vn(de) merer vorwaringe . so hebbe wi hinr(ik) vn(de) / allexius valkenhagen geheten . vse ingezegele mid den ingezegelen der erbaren ma(n)ne her arnd belsters . her lode/luch reden radma(n)ne to Rozstok . Johan kriuema(n)nes vn(de) Cord tohowers . de hir to tuge ouerleden vn(de) wesen hebb(e)n / mid willen vn(de) witscop ge henget vor dessen breff . geuen vn(de) screue(n) to Rozstok na godes bord drutteynhundert [jar] / in deme viͤf vnde negentigesten jare in deme dage sunte felicis des hilgen bichtegeres . /