Jk Wynold baggele borgermester to Rozstok Bekenne vnde betꞹge openbare Jn desseme iegenwardigen bre=/ue vor allen luͦden de Ene zeen vnde horen lesen . dat ik na rade willen vnde vulbord myner negheste(n) erue(n) / vnde vrꞹ(n)d . reddelken vnde reckelken . vorkoft vn(de) lathen hebbe vn(de) vorkope vn(de) lathe in desser scrift . deme / Erbaren ma(n)ne Mathieze van borcken Borghere to rozstok . de ganczen helfte des dorpes . høues . molen . / vn(de) ghudes vnde suͦnderliken de helfte des quekes Jn deme suluen hoͦue ¹ . alze peͤrde koẏe schapp vnde al=/le varendehaue half bewegelik vnde vnbewegelik . vor de helfte der pennẏnge . dar ik id vmme / gekoft hebbe . de he my mit reden telleden pennẏnghen wol to dancke bered vnde betaled heft . Bruͦcliken / to bruͦkende myt aller vricheit em to hebbende vn(de) to bezittende also vrẏ alse dat my vn(de) myne(n) eruen . / vorbreuet vn(de) besegheld is vn(de) wy dat beseten hebben . myt aller tobehoringe alse dat nv licht vn(de) van ol=/dynges geleghen heft in allen enden sẏner schede myt rechte vn(de) rechticheit . myt aller pacht vn(de) bede / mẏt richte vnde denste myt deme hogesten richte alse in hand vn(de) in hals vn(de) myt deme sydeste(n) rich=/te myt alleme broke he zẏ genomed wo he genomed zẏ . myt deme tegheden . vlass(en) . honre vn(de) quekes / vnde alle breue de vppe dyt vorb(e)n(omede) dorp vnde ghud spreken . em hulplik to wesende in aller wyes alse . / wol alse mẏ . vnde mathias vorb(e)n(omet) . mach de vorb(e)n(omede) helfte des dorpes hoͦues¹ molen vn(de) ghudes alse vorscre=/uen steit vorsetten . vorkopen vorgheuen vorvromden Jn ghestlike edder wertlike achte keren wor he / wil sunder jenygherleye weddersprake . Alle desse vorscreuene(n) stucke vn(de) en yewelik by zyk loue ik / Wynold baggele borgermester myt myne(n) eruen vorb(e)n(omet) mathieze van borcken vorscreuen stede vn(de) vast / to holdende sunder argelist vn(de) huͦlperede To merer bewaringe dess(er) dẏnge so hebbe ik Wynold bagge=/le borghermester myn Jngesegel myt willen vor dessen bref gehenged . Tuͦghe dess(er) dynge zynt de er=/baren vorsichtighen heren . her lodewich cruse Borghermester vn(de) her gherd grentze . her Tyderic hollog(er) / her hinric katzow . vnde her vlrich grulle radma(n)nes to Rozstok . de Ere Ingesegele to tuchnisse vnde to / witlichheit mede vor dessen breff gehenghed hebben . de gheuen vn(de) screuen is to Rozstok na godes bort / druͦtteynhundert Jar in deme vyue vn(de) negentigesten Jare . des vrydages neghest na suͦnthe andre=/as daghe des aposteles (christi) . /