Wytlik si alle den ghennen de dessen breef zeen edder horen lezen . dat wy Borghermeystere vnde Ratma(n)ne der staet to Rozstok Bekennen vnde / betughen openbare Jn dessen breue . dat wy mit eyndrachtighem rade vnde vulbort vser aller Redelken vn(de) rechtliken . hebben vorkoft . vn(de) uorlate(n) / vn(de) uorkopen vn(de) uorlaten Jn desser scrift . deme bescheydene(n) ma(n)ne Berende vrowdenrike Borghere to lub(eke) vnde sinen rechten eruen yn vn(de) vte vsem / ghantzen gude vn(de) dorpe . dat ghenomet is Rouershaghen mit alle siner tobehoringhe . alze dat gheleghen is achtevn(de) vertich m(a)rc jarliker Renthe / Rozstocker pe(n)nynghe . vor zoes hundert m(a)rc der suluen mu(n)te . dede Berend vorscreuen hern dyderik holloghere mede ku(m)pane vses rades van / vnseme hete ghensliken to sinen willen vn(de) to siner noghe van vser weghene . wol betalet heft vor de hundert lodighe m(a)rc vn(de) vor de achte m(a)rc lodi/ghes suluers . de wẏ sinen vadere hern Euerde holloghere deme got ghnedich sy vore vn(de) hern dyderke vorbenomet na schuldich weren . Alze welke / achtevndevertich m(a)rc rente Rozstok(er) vorbenomet wi vn(de) vse nakomelinghe vn(de) sunderghen de weddeheren vser staet de to der tijt sint alle jaer to / wẏnachten willen vnde scholen gheuen vn(de) betalen Berende vorben(omet) . vnde sinen erue(n) vnde nakomelinghe Edder den jennen den he edder sine erue(n) / de vorscreuene(n) Rente vorgheuen . vorkopen . vorzetten edder uorlaten zunder lengher vortogheringhe vn(de) zunder ienigherleye hinder Binnen der staet / tho Rozstock mit reden pe(n)nynghen vmbeworn van der ersten Rente vn(de) pacht . de vte deme vorscreuene vnsen ghantzen dorpe vnde ghude to deme / Rouershaghen kumpt vnde utegheuen wert . vortmer so heft Berend vorscreuen vnde sine eruen vullenkomene macht . dat se desse vorbenome=/den achtevnde vertich m(a)rc jngheldes moghen vorkopen . vorgheuen . vorlaten . vorpanden . voranderen efte vorzetten an gheystlike p(er)sonen ofte an / werlike wor vnde weme se willen to gheystliker efte to werliker achte vor zoeshundert m(a)rc Rozstocker pe(n)nynyhe edder den jennen dar id an vor=/andert wert . Jodoch so heft vns vn(de) vnsen nakomelinghen de sulue Berend vrowdenrik vorben(omet) dor sunderliker vruntschop willen ou(er)gheuen vn(de) / ghund . dat wẏ desse zuluen achtevnde vertich m(a)rc jngheldes alle jaer to wynachten moghen wedder kopen vor zoes hundert m(a)rc Rozstocker / pe(n)nynghe de wẏ vnde vse nakomelinghe mit der Rente de den to der tijt boret willen vnde scolen betalen Berende vorscreuen vnde sine(n) erue(n) / vnde nakomelinghe(n) edder den jennen dar id an vorandert wert binnen der staet tho Rozstock vmbeworn in ener su(m)men mit reden pe(n)nynghen alze / den ghenghe vnde gheue zyn . vnde wanne dess(e) vorscreuene su(m)me gheldes mit der Rente vte gheuen vnde betalet is zo schal dat vorscreuene dorp / vns vnde vser staet wezen vry quyt leddich vnde loes . vnde loue(n) an desser scrift vor vns vnde vnse nakomelinghe alle desse vorscreuene stukke / vnde eyn iewelik by sik deme vorbenomeden Berende vnde sinen erue(n) vn(de) nakomelinghe(n) stede vn(de) vast to holdene Jn guden truwen zunder alle arghe/lyst vnde hulperede . To groterer betuchnisse alle desser vorscreuenen stukke zo is vser staet Jnghezeghel ghehenghet vor dessen breef . de / ghegheuen vn(de) ghescreuen is na godes bort to Rozstock drutteynhundert Jaer Jn deme zeuen vnde neghenteghesten Jare des achteden da=/ghes tho twelften /