Ik Hynric Katzow . Radman to Rozstok . Bekenne vn(de) betughe openbare Jn dessem yeghenwardigen breue vor allen / luden . de ene zeen vnde horen lesen . dat ik myt wolberadene(n) mode . myt vulbord myner Eruen vn(de) negesten Re=/deliken vnde Reckeliken . vorkoft vnde lathen hebbe . vnde vorkope vn(de) lathe in desser scrift . deme Erbaren manne / Meyster Corde romer . des Rades scryuer to Rozstok vnde synen rechten eruen . twelftehalue mark gheldes Rozsteker / pennẏnye vnde twe schillynge gheldes der suluen munthe . alle Iar vptoborende vthe deme ghude to deme Euer=/deshagene van den nascreuene(n) buren . edder eren nakømelynge(n) . de de houen vnde høue buwen vn(de) besitten . alse van . / putklote viftehalue mark vnde vyff schillynge . van Merthen veer mark vn(de) neghen schillynge . van dancquard / achteyn schillynge vnde van poppen achteyn schillynge . vor hundert mark Rozsteker pennynge vn(de) druttich / mark der suluen muͦnthe . de he my an reden telleden pe(n)nyngen bered heft . myt aller vryheit . Rechte vn(de) rechti=/cheit . vnde myt aller tobehorynge . alse dat licht vn(de) van oldynges geleghen heft in allen enden syner schede . myt / aller pacht vnde bede . myt richte vnde denste myt deme hogesten richte alse in hand vn(de) in hals vn(de) myt deme sy=/desten richte . myt alleme broke he zy genomed wo he genomed zi . myt deme rochone vn(de) vlas tegeden . myt / aller vricheit also vry alse dat her Engelbrecht katzow myne(n) vadere . my . vnde myne(n) brodere hans katzow van / hynric valkenhagene vorbreued is . vn(de) wy dat besethen hebben . to hebbende vn(de) to besittende in aller wise alse / hinric valkenhagens breff vtwiset den he vs dar vp beseghelt heft . alle breue . de vppe dyt vorb(e)n(omede) ghud spreken / en hulplik to wesende . Vnde meyster Cord romer vn(de) syne rechten erue(n) . moghen dyt vorb(e)n(omede) ghud to deme Euerdes=/hagene by sik edder eren vrunden . wo vaken en des nod vnde behoff is panden sunder broke vn(de) de pande / dryuen vlotten edder vuͦren¹ an ene stede bynne(n) vses heren lande to mekelenborgh . wor id en alder euenst ku(m)pt / myt den panden to varende alse myt voruolgeden panden . de in alleme rechte voruolged zynt . vn(de) moghen ok . / dyt vorescreuene ghud vorsetten . vorkopen . vorgheuen . vorvrømeden in geestlike edder wertlike achte kere(n) . wor / se willen . Alle desse vorescreuene stuͦcke vn(de) en yewelk bi sik . loue ik hinric katzow radman to Rozstok myt / myne(n) rechten eruen vorescreue(n) . meyster Corde romer vn(de) synen rechten erue(n) stede vn(de) vast to holdende suͦnder . / hulperede vnde argelist . To merer bewarynge alle dess(er) vorescreuene(n) dynge so hebbe ik hinric katzow vorb(e)n(omet) / myn Jngesegel myt den Jngesegelen her mathias axecowe ridd(er)e vn(de) hinric grentzen borghers to Rozstok myner / suͦster manne to vulbord vor dessen breff gehenged . Tughe desser dynge synt de Erbaren ma(n)ne her Wynold / baggele borgermester her Tyderic hollogher radman to Rozstok vn(de) mathias van borken borgher dar sulues . de / ere Jngesegele to tuchnisse vnde witlicheit mede vor dessen breff gehenged hebben . de gheuen vn(de) screuen is / to Rozstok na godes bort . drutteynhundert Jar in deme seuene vn(de) negentigesten Jare Jn sunthe Mathias aue(n)/de . des hilghen apostoles (christi) (etc.) /