Wẏ Wẏnold Bagghele Borghermester to Rozstock vnde Gherd gre(n)tze Ratma(n) dar zulues vorstende(re) des godeshuzes zu(n)/te Jurgens Buten der mvͦren to Rozstock Bekenne(n) vnde betuͦghen openbar(e) in dessem breue dat wẏ mẏt vsen na/komelinghen . hebben vorkoft deme beschedene(n) ma(n)ne Hermen grawetoppe vnde zin(en) recht(en) erue(n) to pacht/rechte zunte Jurgens hoef de de nyehoef ghenomet is vnde beleghen is twisschen des stades velde to Rozstock / vnde deme Sẏldemower velde myt vif houͦen myn vif morghen vor veerhundert m(a)rk Rozstocker pe(n)/ni(n)ge . den hoef schal he hebbe(n) vnde bezitten vn(de) zine erue(n) myt aller to behoringe Mit watere myt water/lope afvlote vnde tovlote Mit wisschen mẏt weyde Mit ackere buwet vnde vnghebuwet Mit holte / vnde holtinge myt busschen vnde myt studen vnde Meenlike(n) myt aller nuͦd vnde bruklicheit wo de / ghenomet zin vnde mẏt aller Bruklicheit vn(de) vrigheit alze de zulue hof van oldinghes ghehord heft / vn(de) beleghe(n) vn(de) begrepe(n) is in alle(n) ende(n) ziner schede Jn lenghe in brede Jn hoghe vnde an dupe to zu(n)te Jurge(n)s / godes hues altes nicht vtghenome(n) Men zu(n)te Jurgens godeshues vnde den vorstendere(n) dar ane to behol/dende Richte vnde denst vnde zoes Rockhoure van dessem vorbenomede(n) houe schal h(er)me(n) g(ra)wetop(pe) vn(de) / zine erue(n) deme godeshues vnde den vorstendere(n) vorbenom(ed) vnde ere(n) nakomelinghe(n) gheue(n) to pacht [veer vn(de)] / dortich m(a)rk Rost(ocker) alle Jar to zu(n)te merte(n)s daghe dit loue wi vorbenomede(n) winhold vnde gherd vorbeno(med) / myt vsen nakomelinge(n) hin(ric) g(ra)wetoppe vnde zine(n) erue(n) stede vn(de) vast to holde(n)de vor alle weddersprake vn(de) / zunder arghelist To tughe der warheit hebbe wi zunte Jurgens inghezeghel myt vsen inghezeghele henghet / vor desse(n) bref hir were(n) ouer to tughe de Erlike(n) lude her dẏderik hollogher vnde her olrik grulle de ere / inghezeghele mede to tuͦghe henghet hebb(et) vor desse(m) bref de de gheue(n) vnde sc[reuen] is na godes bort druttey(n) / hu(n)dert Jar jn deme neghe(n) vnde neghe(n)tegheste(n) Jare In zunte Egidius daghe des hilleghe(n) abbates /