Anno d(o)m(ini) Millesimo ccccº xlvº ffe(ria) prima an(te) Oculi . Swor he(n)ningh Arndes / de becker knecht ene witlike oreueide Alse he seten hadde in der Stat slote dar v(m)me / dat he myt sinen medehulpere(n) hans babben knecht des vormans gheslaghe(n) hadde / vn(de) em nome(n) hadde ene luchte vpper vrige(n) straten dar he v(m)me scholde leden hebben / de pine vn(de) den dwank des rechtes dat he noch sine erue(n) ofte sine vrunt boren ofte / vngheboren noch nement van siner weghen ghestlik ofte werlik scholen noch en / willen witen ofte wreken veiden ofte bescheddigen den Rad der Stat Rozstok / ere borghere ere denre noch babben ofte sine(n) knecht noch de ene grepen noch / nemende v(m)me der vorbenomeden schicht willen bi landes leghere bi manscop / leuende vn(de) vort in tokome(nden) ewighen tiden dit schude in der Jeghenwardicheit / der richteheren Alse her Johan vnrowen vn(de) her Johan langen dar mede an / vn(de) ouer weren godeke olyesleger hinrik swinge hans Cl¹ Culteman vn(de) / vele anderer mer vrome(r) lude vte den bakwerke tuges vn(de) loue(s) werdich . /