Jk hermen van der lipe knape wonaftich to der lipe bekenne vn(de) betughe openbare in desseme breue dat ik myt myne(n) erue(n) schuldich / bin van rechter schult den Ersamen borghermesteren vn(de) Radma(n)nen der Stat Rozstok dordehalff hundert mark Sundesch Roz/stocker witten penni(n)ghe vn(de) schillingher de ik ofte myne erue(n) en to danke betalen scholen vn(de) willen Alse nv to Sunte Mertens / daghe neghest tokomende vort ouerme Jare myt ghuden witten penni(n)ghen vn(de) schillingheren bynnen Rozstok alse se dar denne / ghenghe vn(de) gheue synt edder myt so velen voruolgheden nogaftighen panden de myt alleme rechte voruolghet synt dar de Rad / to Rozstok vorben(omed) den Su(m)men desses vorscr(euen)en gheldes mede moghen nemen to ener tid vnbewore(n) to Crystene(n) luden edder to yode(n) / sunder lengher vortoch Alle desse vorscr(euene)en stucke loue ik hermen van der lipe vorben(omet) myt myne(n) erue(n) vn(de) myt myne(n) truwen / medeloueren alse Clawes tulendorp wonaftich to lusenisse henneke kerkdorp to vitkowe mathias van ortzen to lutken tessyn / vn(de) heydenrik tulendorp wonaftich to der horst Louen vn(de) segghen alle myt ener vnuorschedene(n) voruolgheden sameden hand deme / Rade der Stat Rozstock vn(de) alle den Jenne(n) de dessen breff hebben myt eren willen se sin ghestlik ofte werlik an guden truwen stede / vn(de) vaste to holdende sunder alle arghelist In groterme loue(n) tuchnisse vn(de) warheide alle desser vorscr(euen)en stucke So hebbe ik herme(n) / van der lipe vn(de) wi medelouere vorben(omed) vnse Jngesegele myt willen vn(de) gantzer witscop henghet laten in dessen breff Jn den / Jaren vnses heren dusent verhundert in deme souenvndevertigesten Jare Jn deme daghe Symonis [et] Jude der hilgen Apostele /