Wye wizslau vnde zambur von der gnade ghodes vorsten van ruẏen bekennet vnde tughet an dessen ieghenwardeghen breue . dat wye alle de schelinge vnde twidracht . de twischen vns beẏden heft / gehewesen . dat wẏe de al hebben geheiket unde ghesuͦnet . also . dat alle de vordachtnisse . up unse man . up unse stede . vnde up abbet arnolde van deme nẏen campe . ganz af hebben ghelaten . vnde / eẏn ganz vruntscop vnde suͦne twischen vns . vnde man vnde stede scal sẏn . Voert mer were dat also . dat ghot uorlate uns . dat ienich schelinge schude twischen vns . der schelinge scholen weldich sẏn vnse / man vnde vnse stede . also . So wellic vnser vnrecht hedde . den scholen manen vnse man . vnde vnse stede . dat he rechte duͦ . So wellic erer das nicht en dede . so scholen vnse man . vnde vnse stede . bi deme des / dat recht is bliuen . also lange . wante he weder doẏt dat unrecht . mit vnser manne vnde stede rade . Were ouer dat also . dat vnser man . oder vnser stede ienich tieghen vns were oder vns vnrecht dede . so / scholen vnse anderen man . vnde vnse andere stede . bi uns bliuen . also lange . wente se vns dat wedder duͦn . Voert mer were dat also . dat vnser eẏn oder wẏe beẏde . unsen mannen oder / vnsen steden . ienich unrecht deden . so scholen vnse man . vnde vnse stede . thuͦ samene bliuen . tieghen vns . also lange . wente wẏe se bi rechte laten . vnde dat unrecht weder duͦn . Oec wille wẏe twe bruͦ/dere wizslau vnde zambur . dat vnser eẏn deme anderen helpen schal . up alle de leuet . de uns vnrecht duͦn willen . den schole wẏe wedder staen . mallic mit deme anderen mit al vnser macht . thuͦ al/len sinen rechten saken . Voert mer so wille wẏe dat witlic si . dat unse man . vnse stede vnde unse slote vnser negheen . deme anderen . schal untferen oder unteruen . vnde dat unse samende / hand ewichliken een bliuen schal . vnde vnghe scheden . Dat desse ding unghebroken vnde stede bliuen . so hebbe wẏe daer up ghelouet vnsen mannen . vnde vnsen steden untruwen . vnde se hebbet / vns weder ghe louet . De riddere sint desse: iohan van gristow . hinrick van dechowe . conrad dotenberch hinric van den woelde . werner van tribbeses . hinric vnde iohan vnde conrad de bruͦdere van den / bughe . chotan mordere . thideric bere . mathias van der boeken . boekeman de iunge . arnold van viten . gherlach van smachteshaghen . frederic van alkuen . arnold wokenstede . ernest budde . ioachim . vit/co molteke . Unde de raetman van deme stralessunde dat sint desse . conrad heren rederes sone . thideric . van dorpen . albert kureland . bernard van scaprode . gherwin van semelowe . iohan van stradeborch / albert sachteleuent . iohan woltdorp . herman witte . iohan van meppen . arnold van reuele . bertram trauendemunde . seghefrid . ghodeke heren ẏben . iohan cranz . witte bertold . wicbern . Dat desse / ding vast vnde stede bliuen so hebbe wẏe sterket desse scrift mit vnsen ingheseghelen . vnde unser man . de hir ghescreuen sint . her pritbur van der uilmenitz . lodewich kabolt . rauen buk / gherlach van smachteshaghen . ernest budde . arnold van viten . arnold wokenstede . thideric mezecowe . ioachim . victo van alkuen . iohan van gristowe . claus vn(de) tezitse Van pudbus/ke . hinric van der osten de marscalk . hinric van dechowe . werner van triubbeses conrad dotenberch . thideric bere . arnold van der osten . chotan mordere . Vnde mit den ingheseghelen / vnser stede . van deme stralessunde . van trubbeses . van grimme . van baert . vnde van lozitse . Dit is gheschen in der stat thuͦ deme stralessunde na vnses heren godes bort dusent iaer / dre hundert iaer in deme veerden iare in sunte iohannes daghe ante portam latinam