In godes namen amen . Wy wizlaf van godes ghenade vorste to ruyen Bekennen vnde tuͦghen in dessen openen breuen Dat wy mit beradene mode / vnde mit guden willen na rade vser truwen manne hebben ghe gheuen vnde ghelaten eweliken vser leuen stat tome stralessunde vnde allen / inwoneren der seluen stat , de nu sint vnde noch tokomende sint , alsodane rechtecheyt vnde vryheit als de stat to rostok van hern borwene / vnde sinen kinderen hinrike vnde claweze van oldens is ghe gheuen vnde ghelaten . Quemet also des nicht en sche dat rostok in ereme / rechte vnde erer vriheyt krenket worde Jodoch schal vse stat tome stralessunde vnde alle inwonere bi sodaneme rechte vnde vriheyt / bliuen eweliken also hir vore screuen is ,, Vortmer gheue wy en gantzen eghendom eweliken vnde yuͦmmer ouer de stat stralessunde vn(de) ouer / al dat binnen erer scheyde is , an lande watere versch vnde solt an weyde an holte busch vnde struke mor vnde bruͦk . acker buwet / vnde vnghebuwet vnde visgherie mit aller nvͦt vnde vriheyt to des stades rechte . De schede to landewart beghinnet aldus . van / der schede to voghedehaghen vp de schede to luderhaghen van der schede wente vppe de schede tome voghelsanghe , vort van der schede wente / vppe lutzower schede . Dar van vort bet vppe de schede to langhendorpe ,, van der schede vort bet vp gherbodenhaghens schede . vort / went vp kedingherhaghen schede bet in dat solte water Hir na beghint des solten wateres schede . van der nyen owe wente tome / ende des yelandes ,, van danne wente to deme ende to vmanz . van denne vort wente to byssin . van byssin wente der beke brezenitz / mit der see to tevin mit dem deneholme ,, Weder vort bet to der nygen owe , binnen desser vorbenomeden scheyde in beyden siden des / ouers vnde des strandes mit dem gantzen eghendom . mit vriheyt vnde mit visgherie mit aller nvͦt to stades rechte also hir vor bescreue(n) / is . Bynnen desser schede des solten wateres scholen vse man vnde vse lantzeten mene mit En visgherie hebben , vort gheue wy ok / vser stat tome stralessunde dat vtuorent wente it en euene kŏmt , vorbat wolde yenich man schuldeghen vse borghere tome stralessunde / de schal en volghen in de stat tome stralessunde vor den voghet vnde vor de ratman to richte als eyn stades recht is . It ne were dat he butene / in eneme anderen richte breke oder dat men eme tospreke vͦmme lengut dar he man van were ,, vortmer leydes . willekores . vnde aller / anderen vriheyt also se van olders hebben ghehat scholen se bruͦken . Hir bouen schal vse stat tome stralessunde in allen eren anderen hantuestin=/ghen de se hebben vnvorsumet wesen ,, vort mer dor vromen vn(de) dor makes willen vser stat tome stralessunde gheue wy vn(de) sunderliken ghvnne(n) / en des dat se moghen vn(de) scholen ere bescholdene ordele voren vn(de) halen to lubeke ,, vmme desse vorbenomeden stucke hebben se vs ghe gheuen ses dusent / mark wendescher pennynghe vn(de) vsen tollen weder vry den se kost hadden vmme vif dusent mark pennynghe . Den seluen tollen schal men nicht / verhoghen . mer he scal also bliuen als he heuet van olders ghewesen , worde yeneghe schelinghe vmme den seluen tollen . de scolen de ratman tome strales/sunde vntscheden mit eren eyden . vn(de) dat scal dar bi bliuen . Och scholen vse man bi sodaneme rechte bliuen . als it van olders heuet ghewesen . Hir mede scal / endet vn(de) leghert wesen al vnghemot . verdachtnisse vn(de) twidracht . ofte yenich twischen vs vn(de) vser stat tome stralessunde heuet ghewesen . vn(de) wy scolen / er holde vn(de) er ghenedeghe here wesen . vn(de) se scholen vse truwen borghere wesen .,, Vppe dat desse vorbenomeden stucke . van vs . van vsen erfnamen vn(de) vsen / nakomelinghen vaste vn(de) vntobroken eweliken bliuen . so hebbe wy desse scrift mit vseme ingheseghele beseghelt to eneme eweghen orkunde . De tughe de / dar ouer weren heten aldus . her nycolaus van pudbuͦzke . her syuert van plone . her ernest budde de voghet . her nycolaus van starkowe perrere to bart / her otte slore de pleban tome stralessunde . her johan dotenberch . her herman van wokenstede . her renuart van penyz . her johan cabolt riddere . vnde / vele andere guder lude ,, Desse bref is ghe gheuen vnde ghescreuen in der stat tome stralessunde na godes bort Dusent jar Drehundert jar in dem / verteynden jare des vrydaghes na allermanne vaste