In godes namen amen . We wizlaf van godes ghenade , vorste tho ruyen . Bekennen vn(de) tvͦghen in dessen openen breuen . Dat we / mit beradene mode vnde mit gudem willen na rade vser truwen manne hebben ghe gheuen vnde ghe laten eweliken vser leuen / stat tome stralessunde vnde allen inwoneren der suluen stat , de nvͦ sint vnde noch tokomende sint , alsodane rechticheit vn(de) vriheyt / als der stat to Rostok van hern borwene vnde sinen kinderen hinrike vnde claweze van oldens is ghe gheuen vnde ghe laten / Quemet also des nicht en sche , dat rostok in ereme rechte vnde erer vriheyt krenket worde Jodoch scal vse stat tome stralessunde vn(de) / alle inwonere bi sodaneme rechte vnde vriheyt bliuen eweliken al so hir vore screuen is ,,* Vort mer gheue we en gantzen eghendom / eweliken vnde yvͦmmer over de stat stralessunde vnde ouer al dat bynnen erer schede is , an lande watere versch vnde solt / an weyde an holte busch vnde struke mor vnde bruͦk , acker buwet vnde vnghebuwet vnde visgherie mit aller nvͦt vnde vriheyt / to des stades rechte . De schede to lande wart beghint aldus , van der schede to voghedehaghene vp de schede to luderhaghene / van der schede went vͦp de schede tom voghelsanghe vort van der schede vͦppe lutzower schede , Dar van vort bet vͦp de schede / to langhendorpe ,, van der schede vort bet vͦp gherbodenhaghens schede vort went went vͦp kedingherhaghen schede bet in dat / solte water Hir na beghint des solten wateres schede van der nygen owe wente tome ende des ihelandes , van denne / wente to deme ende to vͦmanz van denne vort wente to byssin , van byssin wente to der beke brezenitz mit der se to terin / mit dem denehohne , weder vort bet to der nygenowe bynnen desser vorbenomeden schede in beyden siden des ouers vnde des / strandes mit gantzen eghendom mit vriheyt vnde mit visgherie mit aller noͧt to stades rechte also hir vor bescreuen is / Bynnen desser schede des solten wateres scholen vse man vnde vse lantzeten mene mit en visgherie hebben ,, vort gheue we och / vser stat tome stralessunde dat vtuorent went it en euene kvͦmt ,, vorbat wolde yenich man schuldeghen vse borghere tome stralessunde / de scal en volghen in de stat tome stralessunde vor den voghet vnde vor de ratman to richte als eyn stades recht is . It ne were dat he / butene an eneme anderen richte breke oder dat men eme to spreke vͦmme lenghut dar he man van were ,, vort mer leydes wille=/kores vn(de) aller anderen vriheyt also se van olders hebben ghehat scolen se bruͦken , Hir vn bouen scal vse stat tome stralessunde in al eren anderen hantvestinghen de se hebben vnvorsumet wesen , Vort mer dor vromen vnde dor makes willen vser stat tome strales/sunde gheue we vnde sunderliken ghvnnen en des dat se moghen vnde scolen er besculdene ordele voren vn(de) halen to lubeke vmme / desse vorbenomeden stucke hebben se vs ghe gheuen sesdusent marc wendescher pennynghe vn(de) vsen tollen weder vri den se / koft hadden vor vifdusent marc pennynghe den seluen tollen scal men nicht vorhoghen mer he scal al so bliuen , als he heuet / van olders ghewesen ,, Worde yenich schelinghe vmme den seluen tollen . de scolen de ratman tome stralessunde vntscheden mit eren / eyden . vn(de) dat scal dar bi bliuen . Och scholen vse man bi sodaneme rechte bliuen als it van olders heuet ghewesen Hir / mede scal endet vn(de) gheleghert wesen . al vnghemvͦt . vordachtnisse vn(de) twidracht . ofte yenich twisschen vs . vn(de) vser stat tome stralessunde heuet ghewesen . vn(de) we scolen er holde vn(de) er ghenedeghe here wesen . vn(de) se scolen vse truwen borghere wesen , / vͦppe dat desse vorbenomeden stucke van vs van vsen erfnamen vn(de) vsen nakomelinghen vast vn(de) vntobroken eweliken / bliuen . so hebbe we desse scrift mit vseme yngheseghele beseghelet to eneme eweghen orkunde De tughe de dar over weren / heten aldus . Her nycolaus pudbuske . Her siuert van plone . Her ernest budde de voghet Her nycolaus van starkowe / perrere to bart . Her otte slore de pleban van dem stralessunde . Her johan dotenberch . Her herman van wokenstede . Her reynuart / van penitze . Her johan kabolt riddere . vn(de) vele guder anderen lude Desse brif is ghe gheuen vn(de) ghescreuen in d(er) / stat tome stralessunde na godes boͮrt dusent iar drehundert jar in dem verteyden jare des vridaghes na allermanne / vaste