In godes namen amen . Alle de gene de dessen bref horen vnde sen . den do wi witlik . de nu sint vnde noch tokomende sin , dat wi / Ratmanne vnde oldermanne van deme stralessunde , vnd mit vnseme Rechten heren her Wizlawe van godes genaden vorste / van Ruygen ghe sonet vnde euent hebben in desser wis , so dat wi alle hantuestinghe de wi van sinen elderen vn(d) van eme hebben / ghehat ganzliken vorseken vn(d) afacht doͮn bi vnsen eden de wi sworen hebben ghode vn(d) vnsen Rechten heren hern Wizlaw vor=/sten van Ruyan Doch also hebbe wi Jeneghe hantuestincge de vppe dorp , oder vppe sund [...]ke* houen ghan de wi bewisen moͮghen mit / vsen hantvestincgen De binnen vsem eghendom lighghen der schole wi bruken [...]* also de hantvestincge spreken . Och bekenne wi des , / wi Ratmanne vnde oldermanne van deme stralessunde in dessem breue Dat wi nummer vns vorbinden scholen noch in der stat noch / mit dem lande , noch mit neme heren , noch in nener wis wat vorbindincge moghen heren , it en si vses Rechten heren wille her wizlaws / vorsten van ghodes gnaden van Ruyen vnde siner erfnamen , Vort mer so bekenne wi vorsproken Ratman vn(de) oldermanne van de=/me stralessunde dat wi mit ghestliken Rechte , noch an werliken Rechte , nine hantvestincge nuͦmmer moghen vorderen , noch en / scholen , wen de de vs vse Rechte here her Wizlaf van godes gnaden en vorste van Ruyen lest heft ghe gheuen , Hir bouen bekenne / wi och in dessem breue dat wi Ratmanne vnde oldermanne van deme stralessunde , ofte wi desser sake genich breken , so schole wi / leuen in vses Rechten heren des vorsproken gnaden her wislaus des vorsten van Ruyen , Hir mede is al olde twidrachtecheyt / ghelegert , vnde hebben ene ganze sone mit vsem Rechten heren hern Wizlaus vorsten van Ruyan , Dat desse dinc / vast vnde stede bliuen , so hebbe wi Ratmanne vnde oldermanne van deme stralessunde vses stades ingheseghel tvͦ tughe / vor dessen bref ghe henghet , Desse bref is ghe gheuen vnde ghe schreuen in der stat to dem stralessunde na ghodes / [bort du]sent iar drehundert iar an dem verteynden Jare [...] ¹