Wi ... *¹ Wi don witlik allen / luden , vnde betvghet in desser scrift , dat wi van rechter schult sin schuldich , den [nug]achten ² luden ratma(n) vnde olderma(n)nen / van dem stralessunde achte dusent mark wendescher penni(n)ghe de ghenghe sin vnde gheue , desser penni(n)ghe schole wi gheue(n) / heren lambrechte van der lesnitze to deme g(ri)piswolde dusent mark , des neghesten daghes vser vruͦwen daghe d(er) / lateren , vnde dusent mark des neghesten daghes suͦnte michelis daghe , de nv to komende sint , wi scolen en also betalen dat / he de ratma(n) vnde old(er)man , loz late , vnde gheue en eren breef weder de dar vp was ghe gheuen , vort mer scoele wi / den suluen ratmannen vnde old(er)ma(n)nen des neghesten daghes suͦnte nicolawes be talen tve dusent mark , vnde des neghesten / daghes to tvelften tve dusent ³ mark , vnde des neghesten daghes mit vasten tve dusent mark , de nu neghest to komende sint dit / vore benomede ghelt , scole wi en betalen in der stat to deme stralessunde ane thogheringhe in den vore benomeden tẏden, mit / reden penni(n)ghen oder mit pande dar se dit ghelt mede moghen nemen in den iuͦden , Vnde to deme pande scole wi don also pandes recht is / vor alle desse be nomeden dinc , to holdende vast vnde vullenkome hebbe wi den ratma(n)nen vnde den old(er)ma(n)nen van deme strales/sunde alle delle mit samend(er) hant entruwen louet , vnde hebbet dessen bref bevestent laten , mit den ingheseghelen der eraften / lude de hir na volghet vnde oc vore sint be screuen , Dat louede heft van erer weghene van vns mit en entfanghen , / her henninc van stegheliz , her wedeghe van wedele , her henni(n)c van wolkowe , her borchard van d(er) ost , h(er) lodewich van / wedele , vnde her hinrik van redzen , Dit sint de dessen breef be seghelet hebbet , her vlrik , her bernard vnde / herhinrik moltsan , her conrad cremon , Reymer van Wedele , her . Godscalc pren , her bartold pren , her arnold van / vitzen , Godscalk pren , Dit louede wart ghe dan vor der stat to deme stralessunde , na godes bort Dusent iar , dre/hundert iar , des sesteyenden iares , in deme dinghest daghe binnen den achte daghen der hemelvart vnser vruwen svͦn / te marien ,.