We wislaf vorste to ruyen van der gnade godes , bekennet openbare , an desser scrift vnde dot / witlich allen luden , de nuͦ sint vnde noch to komen scolen , Dat we mit godeme willen . vnde mit gan/zeme rade , vnde vulborde , vnser truͦwen rat gheuen . mit vnzen leuen ratmannen . vnde olderman/nen . vnde mit den meẏnen borgeren tome stralessunde ghe degheding(et) hebben als hir na screuen steẏt , / Dat alle twidracht . vẏenschop . vnde vordachtnisze . de twischen vns . vnde en ghe wezen heuet . woruan / wanne , vnde wor de ghe sceẏn sin . dat de altomale vnde gansliken is ghe liket , vor zonet , vor gheten . / vnde to rugghe ghe leghet , also dat se scolen bliuen . bi al erer rechtegheẏt vnde vriheẏt . de se van / olders hebbet ghe hat , vnde al ere hantuestinghe de se van vns vnde van vnzen vorvaren heb/ben . de scole we en holden stede vnde nicht breken , vnde wat de borghere mit vnzen breuen . vnde / mit vnser manne breuen moghen bewizen , dat scole we vnde vnse man en holden vullenkomeliken , / och late we van allen breuen de we van der stat hebben ,, vortmer scole we de borghere van deme / sunde , weder wizen vnde weldeghen in ere goẏt , wor se it hebben in vnzeme lande mit ghena/den . vnde mit vrede to besittende , vortmer so laten desse vorbenomeden borghere mit godeme wil/len . van der ansprake de huͦses to peruͤn . vnde des dorpes to parowe , also dat we vnde / vns erfnamen dat besitten scolen , Bi deszen vorsprokenen dinghen scal it io bliuen . vnde eẏn / stede sone wezen , To ener betughinghe desser dinghe . so hebbe we en dessen bref ghe gheuen , / bezeghelet mit vnzeme inghezeghele , De tuͦghe de hir ouer sin ghe wezen de heten H(er) jo=/han van gristowe , her hinrich van deggowe , h(er) Siuert van plone , h(er) johan van deme bughe / h(er) johan dotenberch , h(er) hinrich bokeman , her ernest van deme hoykenhaghene , h(er) hinrich vnde / h(er) borcgart van der osten riddere , her nicholas van starcowe pleban to bart , vnde h(er) albrecht / pleban to gartze vnze capellane , Dit is ghesceẏn vppe deme rat huze to deme stralessunde / dar ouer sin ghe wezen de menen ratman vnde olderman dar sulues ,, na der bort godes / dusent jar jar . in deme seuenteẏnden jare . in deme daghe des hilghen lichamen / godes