we wiztlaf vorste tu Ruẏen van der gnade godes bekennet openbare an desser scrift vnde duͦt witlich allen luden , de nu sint vnde / noch tukomen scolen , dat we mit gudeme willen vnde mit ganseme rade vnde vuͦlbort vnser truwen ratgheuen , mit vnsen leuen / leuen ratmannen , vnde oldermannen vnde mit den meẏnen borgheren tome stralessunde ghedeghedinghet hebben alse hir na screuen / steẏt , dat alle twidracht vientscap vnde vordachtnize de twischen vns vnde en ghewesen heuet wor van wanne vnde wor de gheschen / sin dat de tomale vnde gansliken is gheliket vorsunet vorgheten vnde tuͦ rugghe gheleghet , also dat se scolen bliuen bi al erer rechti=/heẏt unde vriheẏt de se van olders hebbet ghehat vnde al ere hantfestinghe de se van vns vnde van al vnsen voruarn hebben de scole wi / en holden stede vnde nicht breken vnde wat de borghere mit vnsen breuen vnde mit unser manne breuen moghen bewisen dat scole we / vnde vnse man en holden vullenkomeliken . Och late wi van allen breuen de we van der stat hebben vortmer scole we de borghere / van deme sunde weder wisen vnde weldeghen inere goyͦt wor se it hebben in vnseme lande mit ghenaden vnde mit vrede tuͦ besittende / vortmer so laten desse vorbenumeden borghere mit ghudeme willen van der ansprake des huses tu perun vnde des dorpes to parowe . / also . dat we vnde vnse erfnamen dat besitten scolen bi dessen vorsprokenen dinghen scal it ẏo bliuen vnde en stede sone wesen . To ener betughinghe desser dinghe so hebbe we en dessen bref ghegheuen beseghelet mit vnseme Ingheseghele De tughe de hir ouer sin ghe=/wesen de heren her Johan van Gristowe , her hinrik van Dechowe , her Siuert van plone , her Johan van deme bughe , her Johan Dotenberch , her hinrich bukeman , her Ernest van deme hoykenhaghen . her hinrich vnde her borchart van der Osten riddere , / her Nycolaus van Starcowe pleban to Barth vnde her albrecht pleban to gartze vnde cappelane , Dit is ghescheȳn oppe deme rat=/huse to deme stralessunde dar ouer sin ghewesen de menen ratmanne vnde olderman dar sulues na der bort godes . dusent iar . drehun=/dert iar indeme seuenteȳnden iare in deme daghe des hilghen lichamen godes