Wi wizslaw van der ghnade godes vuͦrste tuͦ Ruẏen , Bekennen vnde betughen openbare in dessen breuen . dat wi mit / beradeneme muͦde vnser truͦwen ratgeuen vnde man hebben redelken vuͦrkoft tuͦ eneme ewighen kope vnsen / ratmannen vnde oldermannen , vnde den menen buͦrgeren tuͦ deme stralessunde , vnse muntepenninghe vnde mun=/te , vnde wesle dar sulues tuͦ me sunde , vrẏg tuͦ besittende tuͦ duͦnde vnde tuͦ latende mede alse we se hadden , vnde / de munte vnde de wesle en scal nergen wesen in vnsen landen , vnde in vnsen anderen steden , wen tuͦ deme stralessunde . / mer vnse muntepenninghe beholde wi vnde vnse erfnamen buten in me lande vnde in steden als wi se vore hadden . vuͦr / dessen ewighen kop hebben se vns ge gheuen dusent mark wendischer penninghe ,, Hir enbouen hebben se vns vnde vn=/sen erfnamen dor leue vnde dor vruͦntscuͦp weder ge geuen , dat wi binnen twintich ẏaren van paschen de nu kumt , / tuͦ welken paschen wi willen desse stucke muͦgen weder kopen vor dat sulue gelt , were dat ok , dat wi ofte vnse erf=/namen desse stucke binnen desser tit weder koften ,, so scolde wi vnde vnse erfnamen id ẏo vmme desse ding holden / alse ere breue spreken , de en dar vp vor ge geuen sint , van vns vnde van vnsen elderen ,, Hir was ouer her hin=/rich van dechowe . Her siuers van plone . Her Johannes vnde Her Conrat Dotinberch , Her Rickold van me smach=/tethaghen . Her vicke bere . Her Nẏcolaws van starcowe . pleban tuͦ bart , vnde hennike bere vnse voghet , Tuͦ er / betughinghe desser ding hebbe wi vnse ẏngesegel vuͦr dessen bref ghehenghet . Dat scude to me sunde na godes / bort dusent iar . drehundert Jar . negentein Jar . des vridaghes na mit vasten .