Wi wizslaf van de[r] gnade godes vorste tuͦ Ruẏen bekennen vnde betughen openbare in dessen / breuen , Dat wi mit beradenen muͦde vnser truwen ratgheuen vnde man hebben redeliken vorkoft tuͦ ene=/me ewighen kope vnsen ratmannen vnde oldermannen , vnde den menen borgheren tuͦ deme stralessunde [vnse] / munte vnde muntepenninghe vnde wessle dar sulues tuͦ me stralessunde vrẏg tuͦ besittende tuͦ duͦnde vnde tuͦ la=/tende mede alse wi se hadden , vnde de munte vnde de wessle en scal nerghen wesen in vnsen landen , vnde in vnsen / anderen steden wen tuͦ deme stralessunde , Mer vnse muntepenninghe beholde wi vnde vnse erfnamen buten in me / lande , vnde in steden also wi se vore hadden ,, vor dessen ewighen kop hebben se vns ghe gheuen dusent mark / wendischer penninghe . Hir en bouen hebben se vns vnde vnsen erfnamen dor leue vnde dor vrentscap weder ghe=/gheuen Dat wi binnen twintich iaren van paschen de nu kvmt tuͦ welken paschen wi willen , Desse stucke moghen / weder kopen . vor dat sulue ghelt , wer dat oc dat wi efte vnse erfnamen desse stucke binnen desser tit weder=/koften so scolde wi vnde vnse erfnamen it ẏo vmme desse dink holden also ere breue spreken . de en dar uͦp vore / ghegheuen sint , van vns vnde van vnsen olderen ,, Hir was ouer henrik van dechowe . her siuert van plone / her Johan vnde her Conrad Dotenberch . her Rickold vamme smachtethaghen . her vicke bere . her Nẏcolaus / van starcowe pleban tuͦ barth . vnde henneke bere vnse voghet , Tuͦ er betuͦginghe desser dink hebbe wi vn=/se Jngheseghel vor dessen bref ghehenghet , Dat scude to me stralessunde na godes bort dusent iar . drehundert / jar . neghenteẏn Jar . des vrigdaghes na mitfasten .