In godes namen amen . wi her iohan van gristowe vnde ghert van gristowe vnses broder sone herren bartolomeus wi don witlith alle den ienen de dessen bref ansen vnde anhoren dat wi mit willen vnde mit beradenen mode vser kindere herren bertrammes en ridder vnde werneres vnde hennekens vnde bartolomeus vnde hinsekens vnde detleues vnde vnser rechten erfnamen hebben vor koft redeliken vn(d) regleken conrade papenhaghene vn(d) sinen brodere herren hermanne papenhaghene borgheren tome sunde vn(d) eren rechten erfnamen dat dorp to der eldena mit twellif houen akkers heghersches landes vn(d) dar to mit alle den kotheren de honre gheuen vn(d) mit erme lande dar se haueren van gheuen vn(d) gheuen hebben mit krochtinse vn(d) mit der hoghenhorst mit den hoppengarde(n) mit holte mit struke mit wate(re) mit wische mit weide mit steyne mit more mit bruken mit torue mit erden mit grunt mit aller nut vn(d) mit aller vrucht de dar nuͦ is vn(d) noch werden mach vn(d) alle vse weide to bedriuende wor dat se willen mit lopende wate(r) vn(d) mit standen wate(r) vn(d) mit alleme rechte mit bede mit muͦnte mit pacht mit smalthegheden mit vlaspenni(n)gen mit meielpenni(n)gen mit burdeneste dar to mit alleme rechte mit deme minnesten vn(d) mit deme grottesten an hant vn(d) an hals vn(d) als it binnen ereme hofflage leghen hef vn(d) noch licht binnen erer schede vn(d) als it vns vse elderen ghe eruet hebben mit aller vugheit ane denest wi vnde vse rechten erfname(n) de scolent vore denen . vort mer so hebbe wi en vorkoft vif march gheldes tome seghebodenhoue an ener houe enes verdendeles vnd(e) de buwet lutteke engelert vn(d) langeswagh(er) vpper horst er iwelich de gift druddehalue march . Darto so hebbe wi en vor koste tome bremerhaghe(n) in deme woltlande vermarch gheldes vn(d) ses schillinge dat gheuet de menen bur ut in deme sulue(n) haghen tome bremerh(aghen) vppe deme ende tome stoltenhaghene wart Hinseke haghemester de gift en punt gheldes van ene(n) verdendele van ener houe vn(d) detlef en punt van also vele landes vn(d) iohan strot en punt van allikeuele landes vn(d) thidema(n) lange de gift ver vntwintich schillinge de heft mer landes . dit vorsprokene gelt vpper horst vn(d) to den bremerhaghe(n) des is vifteyn march gheldes de hebben se tomanrechte ane denest we dit vorsprokene lant buwet de scal en dat gelt vtricte(n) conrade vn(d) herren herma(n)ne papenh(aghene) vn(d) eren rechten erfname(n) . Desses vorsprokene(n) gudes hebbe wi en del ene(n) wedderkop aldus dane wis gheue wi den vorsprokene(n) borgheren nu to sunte michaeles daghe vort ouer dren iaren teyn march vn(d) twehundert so scole wi wedder hebben dit vorsprokene gelt to der eldena vn(d) vpper horst vn(d) to den bremerh(aghen) ane eluen houe gheldes de scolen se beholden in deme dorpe to der eldena vnde ene march gheldes an deme kroghe dit scolen se hebben to manrechte mit burdeneste ane denest . dar en bouen so scole wi nun nemen bede van den vorsproke(n) houen den vnse here de vorste to ruͦyen wi vnde vnse rechten erfnamen scolent vore denen . weret also dat wi des vorsprokenen gudes nicht wedder kofte(n) vppe de vorsprokene tid als it hir vore ghe screuen is so scalit bliuen ere kofte kop conrades vnde herren herma(n)nes papenh(aghen) vn(d) eren rechten erfname(n) vn(d) kindes kinde to eruende van sclechte in sclechte ane ende.weret also dat se ienich man wolde beweren an dessen gude dar scole wi se vn(d) vse rechten erfnamen vt vnturren vp vse cost nicht vp ere . Dit vorsprokene guͦt hebbe wi her iohan van gristowe vn(d) ghert van gristowe vses broder sone vn(d) alle de ienede dar len ane hebben vppe laten vor vnseme heren deme vorsten to ruͦyen vs van der hant vn(d) en to der hant conrade vn(d) herren herma(n)ne pape(n)=haghene vn(d) eren rechten erfnamen vug to vor lettende vn(d) to vor kopende weme dat se willen . Dat desse ding ewigh stede vn(d) vast bliven dar hebbe wi vp ghelouet mit samender hant vntruwen Wi her iohan van gristowe vnde ghert van gristowe vses broder sone herren bartolomeus vnde her iohan dotenbergh vse swagher vn(d) vse kindere h(er) bertram en ridder werner vn(d) henneke bartolome(us) vn(d) hinseke vn(d) detleues . to holdende vn(d) tugende desse vorsprokenen ding so hebbe wi vse ingheseghele hir vore ghe henget . Dit is ghe schen na godes bort dusent iar vn(d) drehundert iar in deme dreuntwinteghesten iare in sunte gregorius daghe tome sunde .