In godes namen . Amen . Wẏ ratmanne thoͧ dem sunde don groͧten in gode alle de desse schrift horet vnde seet mẏt heẏle . To eẏner ewẏghen dachtnẏsse desser ẏeghenwardẏghen / schrift . de hẏr na steẏt beschreuen . So sette wẏ vnde wẏllet al so dat se werden ghe holden vnder ẏn vrouwen vnde iuͦnchurowen . de dar sẏnt vnde wonet an deme huse bẏ . / den swarten broͧderen . bẏ der pẏne vnde bote vnde bẏ der dẏsciplinen also hẏr na ghe schreuen steẏt . Tho dem ersten male wille(n) wẏ vnde settet alduͦs . dat gẏ vrouwen . / vnde iunchurouwen scholen vnder iu kesen mẏt endracht ene mesterẏnnen mẏt deme rade vnde mẏt erer wlbort der twẏer ratmanne de wẏ iu keset vnde settet . Der / meẏsterinnen scholen beẏde alde(n) vnde de iunghen vrouwen vnde iunchurouwen horsam vnde vnderdan syn ÷ ¹ vortmer were dat iuwer ẏenech . dat ghot van iu / vere dede vnkusheẏt eder ouer spil . eder mẏt duͦfte worde wnden eder begrepen eder mẏt anderer vntucht de vrouwen vnde iunchurouwen nicht en temden Uor / sodane bosheẏt vnde vntucht . schal se tu handes wẏken dre mile ut der stat . vnde schal nicht mer weder an de stat komen tho wonende vnde tho bliuende dar / tho schalmen er nemen allent dat se heft tho beterynge des huses . were dat also dat se hẏr weder wolde streuech wesen . So scholet dat de ratman vnde willet / dat so richten dat en ander beware . Uortmer weret dat iuwer ienech worde be sen mẏt ener personen de beruͦchtet were . also dicke se dar mede besen wert al / so dicke schal se ene disciplinen vntfan . vnde gheuen ene mark deme huse tho buwe . were dat se de mesterẏnne drige manede in deme hus vnde se dat nicht / bewaren wolde so schal men se ut deme huse driuen . vnde schal ghe scheẏden wesen van der settschap an deme huse vnde ere woninge schal men vor kopen vnde / dat hus mede beteren . Uort mer were dat en iunchurowe ederen vrouwe mẏt berademe muͦde eder dorch twanges willen ut deme huse voͧre . so wat se dar in / ghe brocht heft dat schal bliuen in deme huse . vnde keren dat in des huses vromen . vort mer were dat en iunchurowe eder en vrouwe tho [...] ² worde gheladen eder ghe / ropen . vnde se nicht vore en queme dor eren quaden willen vor den broke schal se vasten dre daghe tho watere vnde tho brode vnde ene mark schal se gheuen tho deme huse . / Uort mer were dat en vrouwe eder en iunchurowe mẏt der anderen kẏuede an [...]³ eder leghen wolde op de anderen de schal also vort ene scharpe disciplinen vnt / fan . vnde ene mark sal se gheuen tho deme huse . Uort mer were dat en iunchurowe eder en vrouwe de hemelich iuwes kapitteles melde eẏnem vromeden personen . eder / so wat dar ghe schuͦt . mẏt claghe eder mẏt willen . were dat se des bekende mẏt ghuden willen vnde myt⁴ ghuͦdeme mode . de schal vasten dre daghe tho watere vnde tho brode / weret dat se desser stuchke worde vorwunen in deme kapittele . also vort schal men er an legghen dre scharpe disciplinen . vnde eẏne mark schal se gheuen tho deme huse . / Uort mer weret dat iuwer ienich sich schuͦlde mẏt der anderen . vnde dat behort worde van eẏnem vroͧmeden personen . an ouermode eder an vor bolghene mode . der ande/ren smeliken eder snodeliken spreke . de scal vntfan dre scharpe disciplinen . vnde gheuen dar tho ene mark tho deme huse tho buwe . Uort mer so vorbede wẏ dat gẏ nicht / scholen ghan tho tauerne(n) . eder tho anderen hemeliken husen eder boden . vnde och so wille wẏ dat gẏ nicht en schoͧlen eten tho brutlachten . bẏ ener disciplinen . vnde ene mark schal / se gheuen tho deme huse . Uort mer . weret dat en iunchurowe eder en vrouwe sich drunken vor druͦnke . vnde dat openbare besen worde de schal men also tuchteghen dat / en ander dat beware . vnde de anderen en belde dar bẏ nemen . vnde ene mark schal se gheuen Uort mer vor bede wẏ vnde willen . dat gẏ nicht vele schoͧlen lopen in de stat / aller mest so wille wi dat gẏ nicht scholen ghan in de stat na nachtsanghes tẏd . Id en were dat id not eder draplik sake were of leneme . wẏ willen dat gẏ scholen ghan bẏ scho/nemedaghe vnde beschẏnender suͦnnen mẏt orloue iuwer mesterẏnnen . de schal laten ghan twe vnde thwe tho samende eder mer of des not sẏ mẏt ghuder bewisẏnghe vnde / bethuͦghinge . dat se also wanderen vnde ghan dat en vnde iu nen smaheẏt dar af en sche . vnde ene mark scholen se gheuen of se breken en ẏewelik tho deme huse . Uort mer so / wille wi vnde vorbeden . dat iuwer nen schal ghan buten de stat na aflate . tho kerchmissen . noch pelegrimes vart noch vmme nenerhande verf . Sunder orlof der twier rat/man vnde der mesterẏnnen so we dit brecht dat hir boden is de schal vntfan ene disciplinen . vnde ene mark schal se gheuen . Och vorbede wẏ vnde willet dat iuwer nen / also borghe dat de anderen dar af werden beswaret . weret dat id iuwer ẏenich dede so schoͧlet de twe rat man vnde de mesterẏnne ere ghut an tasten vnde ghelden de schult / mẏt erme ghude so wor dat ment fint vnde ene mark schal se gheuen tho deme huse .

Uort mer so vor bede wy dat iuwer nen schal sitten bẏnnen beslotemem doren mẏt / mannes namen se syn gheẏstlik eder werlik . wert se dar mede be sen . so schal se ene mark gheuen tho dem ersten male . wert se anderwarue besen . so schal men de boden / tho breken vnde nicht weder buwen de wilt dat se leuet . vnde se schal sitten openbare ane bode in deme hus . vnde ene mark schal se gheuen . Och wille wẏ dat iuwer nen schal / ghan to nener predekẏe sunder tho der dar dat mene volk tho gheẏt . bẏ ener mark . Uort mer so wille wẏ dat de mesterẏnne vif iunchurouwen vnde vrouwen van den / eldesten tho sich kesen . dat al de stuͤcke de hẏr vore beschreuen sẏn . ghe holden vnde ghe waret werden vnder iu by der pẏne vnde bẏ der bute . also alse de broke tho secht werit / dat desse sesse ẏeneghen broke vor sweghen . vnde dar openbare worde . so scholen de sesse twẏerhande bute aneghan vnde pẏne . Uort mer weret dat desse ses iunchurouwen vn(de) / vrouwen desse broke de hir vore beschreuen sẏnt nẏcht vntrẏchten en kunden . So scholet de twe ratman vnde willet dat also rẏchten dat en ander dat gherne beware , / Desse bref is ghe schreuen na der bort vnses heren Jn deme dusesten iare vnde drehunderesten iare . Jn deme twe vnde druteghesten iare . Jn sunte nicolaus daghe / des bẏschopes . Do weren voremundere . her hinric dahutze . vnde her hinric van loten . ratmanne . Dat se desse stuͦcke scholen alle holden des hebbe wy unse hemelike ingeseghel vor dessen bref ghehenghet