Ik Hinreke wẏthman Johan wẏthma(n)nes sone . eẏn borgher to deme sunde . duͦ wẏtlẏk . allen de / dessen bref horen vnde seen . dat ich vnde mẏne rechte erfnamen mẏt beradene(m) muͦde . mẏne(n) leuen / vedderen bertram wulflame(n) eẏneme borghere to deme sunde vnde sẏnen rechten erfnamen . hebbe ver koft / to eneme eweghen kope . redeken vnde reckeleken . teẏn mark gheldes vnde vẏfvndezestech honregheldes / in deme dorpe to buͦssẏn in deme lande to ruͦẏen . vor hundertmark . vn(de) vor twẏntechmark . sundescher / pen(n)i(n)gghe . de he mẏ to danke bereth heft . desse guͦlde . scolen entrẏchten . Radeke . slagghard . / Suͦleke . Clawes cloth . Gustan . Dubberth . Guddemer . Clawes . vnde koneke . se vnde alle ere / erfnamen . Edder nakomelingghe . de dat guͦth bezẏtten . edder buwen . desse gulde scal bertra(m) . vnde / sẏne erfnamen . vpboͤren alle iar to su(n)te mertens daghe . also alse licht an høvuen . an kothghelde . / an vrẏgeme lande . vnde mẏt alder rechtecheẏth . vn(de) alder to horingghe . also id lichtan sẏner schede / Also id her hinrẏk van parowe eẏn rẏddere . vn(de) sẏn broder bezethen hebben . vn(de) mẏne elderen / vn(de)ich na aldus langghe bezethen hebbe. an watere . an weẏde . an heẏde . an wẏsschen . an struke / an bruͦke . an holte . an moͤre . an torue . mẏt allemem anrechte . vn(de) mẏt aller vrẏheẏt . Dat / late ich em ganstz vnde sẏnen erfnamen . vn(de) verlateth an desser geghewardeghen schrift / vn(de) be holde mẏ vn(de) mẏnen erfnamen . dar nẏcht ane . vortmer schal ich em vn(de) sẏnen erfname(n) / des guͦdes waren iar vn(de) dach . alse id in de(m) la(n)de eẏn recht is . vor alle de vor recht komen wẏllen / vor aller lege ansprake . se sÿ gheẏstlich . edder werlich . desse dẏ(n)gh vaste to holdene . dar loͤue / ich vp entruͦwen . an desser geghewardeghen schrift vn(de) hebbe se bezeghelt mẏt mẏneme ẏnghezeghele / desse bref is ghegheuen vn(de) schreuen . to deme sunde . na godes borth . drutteẏnhundert iar / an deme zessevndevẏftheghisten iare . an vnser vrowen auende . erer hemmelvarth . Tughe(n) / desser dingh zẏnt . her gherwen stuloͥwe . eẏn rathman to deme sunde . henneke van zemelowe / borchard plotze. Everd velehoue . borghere dar sulues : de ere ẏnghezeghele to eẏner be/tuͦchnisse hẏr vore ghe hengghet hebben . vortmer bouen alle desse benomenden dingh wan he / des van mẏ esschende is . so schal ich em dat sulue vorebenomede ghuͦth . gantzeken vor den heren vor laten