Wy borghermestere vnde ratmanne Der stad Thome stralessunde alse h(er)man va(n)me rode hinr(ik) / schele bertram wlflam johan wreen johan rughe ludeke van Cuͦlpen hin[rich] cruͦdener h(er)ma(n) / van Dorpen albrecht broyeland . herman rẏbe Thideman van buͦren borch[ar]d plotze wolt(er) / van Osenbruͦgge . borchard van santebur ludeke ghẏse gherd lowe johan yordens . Jacob / grisenbergh Engelke van Daluitze johan grisenbergh Conrad witte Jacob swertsliper / Thideman van vnna . he(n)nyngh valke clay rockart Thideman cruͦdener johan van der heyde / albrecht ghildehus . arnt van zost vn(de) gregorius swertyng bekennen vnde betuͦghe(n) ope(n)bare / yn desser scrift Dat wi hebbe(n) verkoft redeliken vnde rechtliken mit eyner meenen / endracht vnde mit beradenen moͮ(de) hern albrechte trauelman eyneme ratma(n)ne tho / luͦbeke vnde sẏnen rechten erfnamen vn(de) nauolgheren viif vnde seuentigh mark gheldes / vnser muͦnte Desse vorbenomede(n) viif vnde seuentigh mark gheldes schole wi vt gheuen to / twen thyden yewelkes yares hern albrechte trauelman efte synen rechten erfname(n) efte / eren rechten boden weme se dat beuelen vp tobørende bynnen vser stad thome sunde / alse uppe suͦnte michels dagh achte vnde druͦchtighestehalue mark vnde to pasche(n) achte / vnde druͦchtighestehalue mark sunder yenegherleye hinder vnbeworen Desse vorbenome=/den viif vnde seuentigh mark gheldes hebbe wi dem vorben(omeden) hern albrechte trauelma(n) vn(de) / sẏnen rechten erfnamen verkoft vor neghenhundert mark vnser pe(n)nynge De wi vntfange(n) / hebben vnde an vnser stad nuͦd ghekeret hebben vnde desser ẏarlikes renthe schal vrẏ we=/sen vor scholt vnde allerleye vnghelt vnde denest vnser stad to donde Vortmer so verbin=/de wi vns in desseme breue Dat wi desse vorbenomeden rente scholen vtgheue(n) vnbewoͮre(n) / alse vorscreuen steẏt sunder hinder yeneghes orloghes efte hinder ẏeneghes personen , / he sy gheystlik edder werlik Vortmer were Dat wi desse renthe vorben(omede) nicht vtgheue(n) / vppe de thid vorben(omeden) wat schaden de vorben(omede) her albrecht trauelman vnde syne erfname(n) / Dar af nemen Den schole wi en vprichten Vortmer so hebben vns her albrecht trauel=/man vorbenomet vnde syne erfnamen ghegheuen den wedderkoop Desser renthe vorben(omede) / Der vruͦntschop willen De se mit vns hebben Dat wi desse vorscreue(n) viif vn(de) seuentigh / mark gheldes moghen wedder kopen wan wi willen vor neghenhundert mark sundescher / muͦnte Vnde wanne wi des willen hebbe(n) so schole wi hern albrechte trauelman efte / synen rechten erfnamen vorscreuen tho segghen een half yar thovoren vnde gheuen en / ere neghenhundert mark vørben(omeden) mit der renthe also id syk denne børet . alse tho / suͦnte michels daghe edder tho paschen vorben(omede) an ene betuͦghnisse vn(de) bekantnisse / Desser stuͦcke de vørs(creuen) stan so hebbe wi vnses stades grote Jngheseghel mit vnser rechte(n) / witschop vor dessen bref ghehanghen De ghescreuen is in der stad thome sunde Na / ghodes bort dusend yar drehundert yar in deme neghe(n)vnde sostighesten iare Des / midwekens vor paschen