Vẏ borghermestere vnde ratmanne der stad thome stralessunde bekennen vor vns vnde vnse / nakomelinge in desser yeghenwordighen scrift openbare vnde betuͦghen dat wi hebbe(n) verkoft / reddeliken vnde rechtliken mit eyner menen endracht vnde mit beradenen moͮde Clawes Croͮ=/peline eyneme borghere tho luͦbeke vnde synen rechten erfnamen vnde nauølgheren veftigh mark / gheldes lubescher pe(n)nẏnge Desse veftigh mark gheldes vorbenomet. schole wi vtgheuen tho twen thi=/den jewelkes yares Clawes Croͮpeline efte syneme rechten boͮden wene he dat beuelet vpthobore(n)de / bynnen vnser stad thome sunde alse vppe wẏnachten viif vnde twintigh mark vnde tho suͦnte Joha(n)=/nes daghe tho midden soͮmer viif vnde twintigh mark sunder yenegherleye / hinder Desse verbeno=/meden veftigh mark gheldes hebbe wi deme vorben(omeden) clawes cropelyne vn(de) syne rechten erfnamen / vorkoft vor viifhundert mark lubescher pe(n)nẏnge De wi vntfangen hebbe(n) vnde an vnser stad nuͦd ghe=/keret hebbe(n) vnde desse yarlikes renthe schal vryg wesen vor scholt vnde allerleye vnghelt vnde denst / vnser stad tho donde Vortmer so verbinde wi vns an desseme breue Dat wi desse vorbenomeden renthe scholen vtgheuen vnbewoͮren alse vorscreuen steẏt sunder hinder yeneghes orloghes efte hinder / yeneghes p(er)sonen he sy gheystik edder werlik . Vortmer were dat wi desse renthe vorben(omet) nicht vtghe=/uen vppe de tid vorben(omet) wat schaden de vorben(omeden) Clawes Croͮpelyn vnde syne erfnamen dar af nemen / Den schole wi en vprichten . Vortmer so hebbe(n) vns Clawes Croͮpelin vorben(omet) vnde sẏne erfnamen / ghegheuen den wedderkoop desser renthe vorbenomed dor vruͦntschop willen De se mit vns hebbe(n) / Dat wi desse vorbenomede(n) veftigh mark gheldes moghen wedder kopen wan wi willen vor viif hundert / mark luͦbescher muͦnte vnde wan wi des willen hebben so schole wi clawes croͮpline efte syne(n) rechte(n) / erfnamen vors(creuene) tho seggen eyn half yar tho vøren vnde gheuen en ere vifhundert mark lub(escher) vorben(omeden) / mit der renthe also id sik denne boͮret alse tho wynachten vnde suͦnte Joha(n)nes daghe vorbenomet(h) / an ene betugnisse vnde bekantnisse Desser stuͦcke de vors(creuene) stan so hebbe wi vnses stades grote Jnghese=/ghel van vnser rechten witschop vor dessen bref ghehangen De ghegheuen is vn(de) ghescreue(n) Jn der / stad thome strales(sunde) Na godes bord druͦtteynhundert yar Jn deme seuentyghesten Jare Des neghesten / middewekens vor suͦnte mertens daghe Des hilghen byschopes