In godes namen amen Ik hinrik hilgheghest gezettet yn dat bedde mẏner krankheyt allene ik krank byn / in deme lyue doch byn ik wolmechtich mẏner zẏnne vnde mẏner reddelẏcheit ik sterue edder ik leue so schic/ke ik mẏnen lesten willen vnde myn testament myt mẏnen neghesten vrunden al dus To deme ersten be/vele ik mẏne zele in de walt des almechtighen ghodes vortm(er) gheue ik mẏner zuster taleken clauͦs ghustro/w husvrowe(n) achtentych mark zundisch vortm(er) myneme brodere . broder hermen teyn m(a)rk zundisch vortm(er) / mynen brodere arnde teyn m(a)rk zundisch Desse pennynghe schal men vntrichten ik leue edder ik sterue . myt / desser ghaue zunderghe ik se af van myme ghude ik sterue edder ik leue dat se dar ane noghaftich syn vnde / my edder myne husvrowen nynerleye wiis mer anuerdyghen vmme erue ghuͦt ik en wil en denne wat gheuen myt ghuden willen dat schal to my staen Alle desse vorscreuene stucke wil ik stede vnde vast holden / zunder weddersprake wente it myn vnde mẏner husvrowe(n) wunne(n) ghuͦt ys vnde van nemande anghe er/uet. Dyt is ghescheen vnde ghescreue(n) to deme zünde na godes bort drutteynhundert iar in deme Ixxviij ia/re des neghesten sundaghes na sunte i(o)h(ann)is daghe vor der porten vortm(er) we(re) ok welk van dessen vorscreuen / de sik nycht noghen wolde laten yn desser ghaue de schal nicht hebbe(n) men schal syn del dorch got gheuen /