Jn godes namen amen Jk wolter van der vlsen ghezettet in dat bedde mẏner krankheyt allene dat ik krank byn an / deme lẏue doch byn ik vulmechtich mẏner reddelicheyt ys dat ik wandele dẏt yeghen wardighe leuent so schicke ik / myn testament aldus To deme ersten bevele ik mẏne zele in de walt des almechtighen ghodes Vortm(er) gheue ik / to zunte iacobes buwete to dem zunde druttich m(a)rk zundisch dar van schal men afslan teyn mark de mẏ wollyn schul/dich ys van des ghodes hus weghen Vnde dar zulues keze ik mẏne bẏgraft Vortm(er) gheue ik to vnser vrowen bu/wete twintich mark zundisch To den zwarten brodere(n) twintich m(a)rk zundisch To den baruoten broderen twintich / mark zundisch Vortm(er) gheuik to der kerken sunte iuryens teyn m(a)rk Den elenden to zunte iuryen gheuik teyn / m(a)rk de schal men em delen ysliken zyn deel in de ha(n)t to gheuende Vortm(er) gheuik teyn mark to der kerken to deme / hilghen gheste Den zeken de dar ligghen in den bedden gheuik teyn m(a)rk to gheuende dar af eneme ysliken / zyn deel in de hant . to zunte ghertrude gheuik iii m(a)rk . to zunte maria m(a)gdalene(n) iii m(a)rk . to zunte nycolawe/ze xx m(a)rk Vortm(er) gheuik to der broderschop der scholere van zunte iacobe teyn m(a)rk Vortm(er) gheuik her bernde van / lubeke ene mark vn(de) zynen capellanen ysliken viii schillinghe Vortm(er) gheuik her ghosschalke to dem hilghengheste / ene mark vn(de) her palborne ene mark Vortm(er) her ghert rẏben teyn mark Taleken van der heẏden vif mark hin/ricus weghen(er)e teyn m(a)rk Vortm(er) tydeke wuten docht(er)en twintich m(a)rk Vortm(er) gheuik hermen veleghastes dren doch/teren druttich m(a)rk Vortm(er) / gheuik clawes stouenberghes dochter wobbeken twintich m(a)rk Vortm(er) lambrechtes kind(er)en / van wolten gheuik twintich mark Vortm(er) gheuik calan mẏner magh(et) teyn m(a)rk Vortm(er) gheuik berten lambrechtes ma/ghet van wolten ene m(a)rk Vortm(er) gheuik her arnde van der zyppeken hundert mark dorch mẏner zele willen De / verhundert m(a)rk dar men desse vorscreuene ghaue mede vntrichten schal de weten mẏne vormu(n)d(er)e wol wor ze de / nemen scholen Vortm(er) gheuik ludeken iohannessone . vnde vrederike vnde petere vif hundert mark de ik stande / hebbe vppe bernt kolers erue in der vrankenstraten vor ere anghestoruene erue Van den vifhundert marken / schal ludeke hebben de helfte , vnde vrederik vnde peter de andere helfte Vortm(er) gheuik lamberte van Wolten teyn / zuluerne lepele . berteke van dorsten mẏne zuluerne schalen . Clawes stouenberghe gheuik mẏnen vurschapen Vortm(er) / gheuik hezeke wittekalues eyn ghuldene vinghern Vortm(er) gheuik taleken mẏner magh(et) xxx m(a)r(k) dar schal ze vore / ghaen to rome dorch mẏner zele willen to den x m(a)rken de ik er vore be scheden hebbe Dar to gheuik er dat bedde / dar ze vppe licht myt deme gherede dat dar to horet Al dat andere retschop alze van kannen van gropen van kyste(n) / van beddewande vn(de) anderme husgherade dat dar ouer ys vnuorgheuen dat gheuik mẏneme ome lambrechte / van wolten . ys dat dar wat ouer blift von anderme ghude boue(n) dat ik vor gheue(n) hebbe dat schal men armen luden / gheuen . vortm(er) ys mẏ schuldich herme(n) veleghast viftich m(a)rk Vortm(er) w(er)e yeman van mẏnen erfnamen de dyt testame(n)t / bẏspraken wolde de schal nicht hebben mer men schal zyn deel dorch god gheuen Dyt testament wil ik stede holden / wentik dat zuluen wedderspreke To vormu(n)d(er)en desses testam(en)tes keze ik de erlike(n) lude her hermen rẏben Johan hoghe/dorp . lambert van wolten . tydema(n) van dorsten hermen veleghast Dyt ys ghescreuen to dem zunde na godes bort drut/teynhundert iar i(n) deme achte(n)tigheste(n) jare des zu(n)aue(n)des na twelften [es folgt der lateinische Notariatsvermerk]