In godes namen amen . Ik hinric westvaͤl allene dat ik krank byn in deme lyue doch byn ik vulmechtich myner redde/licheyt vnde myner zynne . ys dat ik af gha so schicke ik myn testament alduͦs . To deme ersten be vele ik myne / zele in de walt des almechtighen godes . Vortm(er) gheue ik den monneken to anclym to deme buwete twe mark zun/disch Vortm(er) gheuik to vnser leuen vrowen to dem zunde . twe mark zundisch Vortmer to zunte iacobe to deme zunde / ver mark zundisch vor myne bygraft de keze ik dar vnde vor clocken . willen se dar nicht so synt se loes . Vortm(er) ghe/uik to deme hilghengheste den zeken de dar ligghen in den bedden . dre tun(n)en beres . Vortm(er) gheuik dre stouenbade den / armen luden hir bẏnnen deme zunde . Vortm(er) gheueik to sunte iurien eyn stouenbat vnde dre tun(n)e beres . Vortm(er) schal / men my wynnen twe hundert zelemissen dorch mẏner zele willen . Vortm(er) gheuik myne twe besten hoẏken twen / armen preste(re)n weme it mẏnen vormunde(re)n ghuͦt dunket . Vortm(er) scholen mẏne vormu(n)de(re) dat spek vor kopen vn(de) / dat ryntvlesch . vnde pennynghen dat . myt den pennẏnghen schal man grawe lakene kopen vnde gheuen de dorch / god . Vortm(er) schal man vorkopen al myn tymmertowe vnde holtwerk vnde gheuen de pennẏnghe dorch god Vortm(er) / mẏner husvrowen kunnen beschede ik vor eren brutschat druttich mark zundisch dar gheue ik er tho hundert m(a)rk / zundisch Vortm(er) gheuik er achte gharne van seuen stighen . Vortm(er) gheueik er eyn wadeschip Vortm(er) eẏnen pik ketel / den schal se bruken to erme lyue . wen se af gheẏt so schal men ene antwarden mẏnen vrunden . Vortm(er) gheuik er / ketele vnde gropen vnde tẏnnen schotelen . also se syn by der want . vnde gheue er stole vnde benke . vnde grote ke/tele vnde lutke . Also se in deme huze zynt . vnde beddeclede(r) vnde andere cledere . vnde ere kysten myt al deme dat / dar ynne ys van clede(re)n dat schal wezen ere huͦs gheraat . den ik er gheue . Vortm(er) schal ze wonen eyn iar to vor / gheues in desme huse na myneme dode . Were dat mẏner husvrowen edder eren vrunden nycht behaghede des/se ghift de ik er gheuen hebbe . so beschede ik de ghaue dat dordendeel vnser vrowen . dat dordendeel zunte nicola(wese) / dat dorden deel to zunte iacobe . Vortm(er) gheuik hillen ener armen vrowen to peron achte schillingh zundisch vortm(er) / gheuik mẏme brodere plonies westvale . vnde gherborgh mẏner zuster malk enen kaen . Dar gheuik en beyde(n) / to anderhalue schute . myt seghele vnde gharne vnde ankere dat dar to horet to visschende . vnde besunderghen ghe/ue ik en beẏen . druttich nyegharne . Vortm(er) gheuik en beyden twelf tun(n)e zoltes . vnde beschede en myn hus mẏt aller / to behoringe dat dar vnvorgheuen ẏs . Vortm(er) gheue ik mẏnes broder dochter ghebbeken vertich mark . We(re)t dat ik / dyt ghuͦt vor therede al to male in mẏner vnkraft edder eyn deel . so schal men desse vorscreuene ghaue vntrichten dar / na dat men to komen kan ¹ . mach Dyt ieghenwardighe testament wil ik stede vnde vast holden so langhe wen ik / dat suluen wedderspreke . To vormu(n)de(re)n desses testamentes kese ik de erliken lude plonẏes mẏnen broder . vnde her/man van eksen . vnde iohan boddekholte . hannes van bremen . hannes nyehus vnde hinrik ludershaghen . Dyt ys ghe/gheuen vnde screuen to dem zunde na ghodes bort . drutteynhundert iar in deme achtentighesten iare des vrydaghes / na pinghesten