Ik ghert van dorsten ghesettet in dat bedde myner krankheyt allene dat ik krank byn in deme lyue doch byn ik wol / mechtich van godes gnaden myner zynne vnde reddelicheyt ys dat ik wandele dyt yeghenwardighe leuent / so schicke ik myn testament aldus . To deme ersten be vele ik myne zele in de walt des almechtighen ghodes Vort/mer gheuik den elelenden to zunte Jurien to deme zunde ver mark zundisch dar scholen myne vormu(n)dere / de hir na gescreuen staen iewelken elende(n) mynsche(n) van gheue(n) zyn deel in de hant . Vortm(er) gheuik to zunte iacobes / buwete to deme zunde dre mark zundisch To vnser vrowe(n) buwete twe mark zundisch Vortm(er) gheuik to deme / hilghen gheste . den zeken de dar ligghen in den bedden ene tun(n)e gudes beres Vortm(er) gheuik den baruoten bro/de(re)n van nyenbrandenborgh . ver mark lubesch . Vortm(er) gheuik der kluzenersche(n) dar zulues ene marek lubesch / Vortm(er) gheuik ghezen brandeshaghens dede vor my ys twe mark zundisch Vortm(er) gheuik euerde lippoldes ko/ke van kampen achte schillingh zundisch vnde zyner magh(et) kathe(r)inen achte schillingh zundisch . Vortm(er) ghe/ue ik myneme ome hinricus van dorsten . herman lowentsnyders sone . sestich mark zundisch ys dat he prester / wil werden . ys dat he nichten wil so scholen myne vormundere myt den zestich marken doen wo it myner ze/le en nuttest dunket wezen . Vortm(er) hebbik by ghert grymmen . xi olde schilde vn(de) vj ryder vnde vranken vn(de) xi rynesche ghuldene Dyt ys ghuden luden witlik Vortm(er) al myn ande(re) ghut dat ik hebbe it zy wat it zy vn(de) / wor ik dat hebbe dat scholen myne vormu(n)d(er)e gheue(n) armen luden an clede(re)n vn(de) an schoen edder wor it ene ane / nuttest dunket wezen wente it myn wunnene ghuͦt ys vn(de) van num/mende an ghe eruet ys Dyt testament wil / ik stede vnde vast holden zo langhe wen ik dat zuluen wedder spreke . To vormu(n)d(er)en desses testamentes keze ik / de beschedene lude lyppolde van kampen . Johannes van zuthem . dyderik van dorsten . hannes clenevote vnde hannes / warendorpe Dyt ys ghescreue(n) to deme zunde na godes bort drutteynhundert iar in deme achte(n)tighesten iare in / zunte albanus auende