In gotes namen amen Ik herbord cruse en borg(er) to deme Sunde . allene dat ik bin crank an deme liue doch so bin / ik ghesunt myner danken vnde myner redelicheyt god sy ghebenedyt . eft syk my(n) leuent wandelt indat eweghe leuent / So sette ik vnde make my(n) testame(n)t in susdaner wys . Tho dem ersten male bevele ik myne zele dem almechteghen gode . / Item do sunte nicolawese . iiij m(a)rk vnde ysliken cappellane dar selues . iiij . s(chilling) . Item gheue yk sunte jacoppe . ij . mark / Item do sunte Ghertruden . ij . m(a)rk . Item do thu vser vruwen . ij . m(a)rk . Item do den Swarten brode(re)n . vj . mark vnd(e) / kyse dar selues myne bygraft . Item do broder ludeken . iiij . m(a)rk . Item do armen cranken twe bade thu yewelike bade / . ij . tun(n)en byres . Item scolen myne vormu(n)de(re) senden enen man thu Rome , in deme ersten yare na myme dode . Item . do . viij . / m(a)rk . armen cranken luden tho schuͦn vnde . iiij . lakene graw vnde wyt armen luden tho clede(re)n . It(em) do den g(ra)wen brode(re)n / ij m(a)rk . Item gheue yk thu voren vt hans cyngestes kynde(re)n dorch god vnd(e) dorch myner zele wyllen . I . mark sundes(ch) . / . Item gheue yk em de halue bode stede de knoken bode de ik hebbe stande tho valsterboden . Vnde gheue em alle dy schaap / de ik hebbe vpme drygghe met hinczeke cyngelow . Vnde gheue em ok dy schaap de ik hebbe to nygendorpe met pen(n)yne / Ite(m) gheue ik henneke ceppelynes kynde(re)n to rouershaghen . I . m(a)rk . Item gheue ik Leneken . ludeke rybbenyssen husfrowe / den besten hoyken . dar gheue yk er thu . x . m(a)rk sundes(ch) . Item gheue yk dorch god vnde dorch myner zele wyllen . cco . m(a)rk / sundes(ch) . dat hebbe ik mynen vormu(n)deren bevolen war sy de gheuen scolen . Item is my sculdich Gherke hegher . ccco . m(a)rk / sundes(ch) Item is my sculdich hans voghe de met my indeme huse is . cco . mark . Item wan alle desse dinch vntrichtet vnde / vt ghe gheuen sint de hir vor ghe screuen stan . wes hir denne ouer blyft an standen eruen an lygghenden gruͦnd an ighe(n)/dome war an dat dat sy dat sy weghelik edder vnweghelyk . Dat scolen myn negesten erfname(n) lyke vnder syk deylen . / Desses testame(n)tes bin ik nogaftich alzo langhe wente ik dat mu(n)tleken wedderspreke . Hir kyse ik thu to vormu(n)deren / Erleke lude . Johan golnyssen . Vycke golnyssen Curt langhedorpe . Johan cyngeste . vnde ludeke rybbenyssen . vnde / bidde sy dorch god vnde dorch myner zele wyllen dat sy dit testame(n)t also vorstan vnde so vor vullen so ik em alles / gudes to truwe vnde gheloue . Ghe gheuen tho deme Sunde na godes bord . mo . ccco . In deme lxxx iare . In sunte / Margareten auende der hylghen juncvruwen