Jn godes namen amen . Jk hinryk rynsberch en borgher thu deme sunde met wolmacht mynes sunden liues got / sy gheb(e)ndyt . Sette yk vnde make my(n) testame(n)t eft syk my(n) leuent wandelt in dat eweghe leue(n)t in alsusdanerwys thu / holdende Thu dem ersten male so be vele yk myne zele dem almechteghen gode . Vortmer so hebbe yk af ghesundert vn(de) af ghelecht mẏne ersten kynde(re) van mynen ersten wẏue alse hinrik vnde johanse met rade vnde met volbort erer vru(n)d / van vader erue vnde van moder erue vnde hebbe em ghe gheuen dat huͦs inder pu(m)per straten . dat hebbe yk em laten / sc(re)uen in des stades buͦk . Vortmer hebbe yk em ghegheuen anderhalf hundert mark sundes(scher) . de ligghen vppe haghe=/mesters erue . dat steẏt ok ghescreuen in des stades buͦk . dar mede sint ze ghenslyken nogaftẏch gheworden . Vortmer de / lesten kynde(re) van der lesten vruwen . alze Gherke vnde Taleke . de sitten met my vnde yk met em vppe wyn vn(de) vp vorlyͤs / Des gheue yk thu voren vte taleken myner dochter wes ẏk hebbe van bedden van dekenen van lakenen van kussen van tafel / laken . gropen kannen ketele . vnd(e) gheue er dar thu allent des dar ẏs van ghesmẏde . Vortm(er) so is my schuldich clawes bullen/spek hundert m(a)rk sundes(scher) . Dar heft he my vor ghesettet in des stades buͦk dat halue erue dar he y(n)ne wonet in der ossenreẏ(ten) st(ra)ten / Vortm(er) is my schuldich her laurenti(us) van spandow en rẏdder . vyf vn(de) veftẏch mark sundes(scher) . dar steyt vor thu pande en suluen / gordel vppe wynachten de na negest tokome(n)de ys thu betalende . Dar hebben mede thu ghelouet hans plote clawes vore=/man vnde hinrẏk heyne met ener zame(n)den hant . vnde merten langhore heft dat gordel in syner kysten . vnde heft dat louede / mede met my vntfanghen . Vortm(er) is my schuldich jacop bytekow . vyf vnde veftẏch m(a)rk sundes(scher) vppe syn erue . dat steyt ghescre/uen in des stades buͦk Vortm(er) wes yk mer hebbe dat sy luttyk efte vele dat sy weghelik edder vnweghelik dat gheue yk alto/male mynen kynd(er)en van der lesten vruwen gherken vnde taleken lyke vnder em thu deylende . Desses testame(n)tes bin ik / nogaftych also langhe wente ik dat mu(n)tleken wedderspreke . Hir kyͤze ik thu tho vormu(n)de(re)n erbar lude alse johan wobyn / Johan zulis . Johan buxstehuden . vnde thydeman douel . vnde bidde ze dat sy myne kynde(re) vorbenoͮmet also vore wesen vnde / also vorstan so yk em alle(n)s ghudes thu truwe vnde ghe loue . Ghe gheue(n) thu deme sunde na godes bort . m . ccc . Jndeme lxxxxij / yͤare . des Danredaghes vor lichtmissen