Jn ghodes namen Amen Jk wobbe la(n)ghenekes de hinrikes la(n)ghenekes husurowe ghe weset ys deme ghod gnedich zẏ . / wolmechtig van godes gnaden al myner reddelycheyt Js dat ik wandele dyt yeghenwardeghe leue(n)t zo be vele yk / mẏne zele der ghuͦde ghŏtlyker barmhertẏcheyt vn(de) sette myn testame(n)te al duͦs Tho deme ersten zo gheue yk de ¹ hu(n)dert / mark vte myneme redesten ghuͦde den broderen thuͦ su(n)tte joha(n)nes tho deme zu(n)de de my gaf my(n) man hinrik la(n)ghenek thuͦ / mẏneme leue(n)de thuͦ bruͦkende vn(de) na mẏneme dode tho gheue(n)de wor ik wolde tho vnsyr beyderzele zalecheyt De vorbenŏ=/meden hu(n)dert mark de gheue yk den vorbenŏmeden broderen in der suͦluen stat vor ene ewyghe mẏssen tho lesende / in erer kerken tho deme alta(r)e der hylghen enghele vnde² vor ene ewẏghe dachtnisse mẏnes ma(n)nes hinrikes la(n)ghenekes vn(de) / myner Vortmer gheue ik deme kercheren thuͦ zu(n)te nicolaus ene mark vn(de) veer synen kappelanen ysliken veer schillin=/ghe Vn(de) zo gheue ik her arnde van der sippeken teẏen mark . Vn(de) gheue her wlfarde vyf mark . vn(de) hilken borntines / de thu pruͦtzen ys gheue ik vyf mark . Vnde gheue tẏlse krusen vyf mark . Vn(de) den elende tho pantelisse gheue yk / twe mark . Vn(de) gheue den wtseteschen de dar wanken hyr vn(de) dar v(m)me de¹ stat tho deme zu(n)de twe mark . Vn(de) gheue den / seken de dar lẏgghen in den bedden tho deme hẏlghen gheste dre mark al zo dat me dessen suͦluen seken vn(de) den vorbenŏme=/den seken eneme ẏsleken syn del gheuen scal an syne hant . Vn(de) gheue broder luͦdeken deme augustmer van anklam dre / mark vn(de) sẏneme ku(m)pane twe mark . Vn(de) gheue der broͤder scop zu(n)te dorotheen ene mark . Vn(de) gheue myneme knechte / kersten twe mark . vn(de) gheue mẏner maghet metten mẏnen wyden rook de ghe vŏdert ys myt buntwerke vn(de) mynen / besten pels . Vn(de) gheue mẏner maghet taleken twe mark . vn(de) myner juͤ(n)gghesten dernen veer mark . vn(de) grethen de / myn machet was ghe wesen twe mark . Vn(de) gheue den zeuen armen luͦden de ik pleghe tho spisende twe mark ysliken / syn del . Vn(de) gheue den elende tho zu(n)te juͦryen twe mark Vortmer al myn andre ghuͦd dat yk hebbe vn(de) vor gheuen / dat be schede yk mynen neghesten erfnamen Dyt testame(n)t wyl yk stede vn(de) vast holden al zo la(n)ghe we(n)ne ik dat zuͤluen / wedder spreke Thu vormu(n)deren desses testame(n)tes kese ik de erlyken luͦde her hermen riben de dar ys eyn rat=/man thu deme zu(n)de Eler badysern kurt wittekalue Bernt houede borghere dar zuͤlues Dyt ys ghe gheuen vn(de) / screuen na ghodes bort dusent jar vn(de) dre hundert jar an deme dre vn(de) achtentychghesten jare des neghesten / du(n)ners daghes na vnser vrouwen he(m)meluart

De vntfanghere desses testame(n)tes vt ghe zand van deme rade zẏnt de erbaren luͦde vn(de) ratma(n)ne her ghert / löuwe vn(de) her tydeman van dorpen ³