In godes namen amen . Ik hinrik buͦcheym borgher tome Sunde allene dat ik krank vnde / vnmechtich bin an myneme lyue . Jodoch van der gnade des almechtighen ghodes bin ik vulmechtich / vnde redelik myner zynne vnde aller myner vornuͦft . Is dat ik wandele dyt Jeghenwardighe / leuent so schicke ik myn Testament aldus . Tome ersten beuele ik myne zele in de hant vnde yn / de walt des almechtighen ghodes . Vortmer gheue ik vnde be schede to gheuende dor myner zele / zalicheit willen x m(a)rc sundesch yn dat ghodeshus to Sunte Nicolawese tome Sunde dar ik / myne bygraft kese . Vortmer beschede ik to gheuende yn dat kloster to Sunte Johannese dar / zulues x m(a)rc sundescher pennynghe . Vortmer gheue ik to Sunte Jacobe deme ghodeshuse / ij . m(a)rc sundisch . Vortmer gheue ik to vser leuen vruwen darsulues myn Teldene perd / Vortmer gheue ik vnde be schede to gheuende den armen cranken notroftighen laden ij m(a)rc / sundisch den elenden to Sunte Jariene vmme to delende vnde to gheuende . Vortmer gheue ik / den cranken luden tome hilghengheste ij m(a)rc sundisch . Vortmer gheue ik den moniken to / den Swarten bruͦderen ij m(a)rc sundisch . Vortmer gheue ik hanse myme knechte myn / grawe perd . Vortmer gheue ik vnde be schede to gheuende Tybben myner husurowen / vnde Cunrade mẏneme sone allent dat dar ouer blift bouen desse vorscreuenen vorghift / dat Lutke mẏt deme groten id sy nomelik edder vnnomelik beweghelik edder vnbeweghelik / schult edder vnschult vnde allent des ik hebbe vnde mẏn is Alle desse vorscreuene dink wil / stede vast vnde vntobroken holden also langhe bet ik de suluen wedderruͦpe vnde wedder/spreke muͦntliken in ghantzer wolmacht mẏnes lẏues To vormuͦnderen desses testamentes / kese ik de erliken beschedene(n) manne her dẏderik Crudener borghermester tome Sunde her / Borchard plotzen . her dyderike van vnna her Johan schulowen . her nicolau(s) wreue Ratmanne / dar sulues vnde bernde vamme Rode borgher dar sulues . ghe gheuen vnde screuen tome Sunde / na ghodes bord drutteynhundert Jar in deme vyfvnde achtentighesten iare des vrydaghes / vor pẏnxsten /