In godes name(n) Amen Ik hinric kersebom borgher tome Sunde allene dat ik krank byn an myneme lyue jedoch van / der gnade godes bin ick wolmechtich vnde redelik alle myner vornuft vnde myner synne Is dat ik wandele dyt ieghen/wardighe leuent so schicke ik myn Testament aldus Tome ersten be vele ik myne sele yn de walt des almechtighen / godes . vortmer gheue ik vor myner sele salicheit willen to den swarten broderen Teyn m(a)rc sundisch dar keze ik / myne by graft . vortm(er) gheue ik to vnser leuen vruwen druͦttich marc sundisch to deme buwe to huͦlpe vortm(er) schalme / vor god gheue(n) van myneme redesten ghuͦde achtentich m(a)rc sund(isch) . den zeken luden to zunte yuͦryene an reden pen(n)i(n)ghen / an wande vnde an kolen vortm(er) schalme bruwen een ghantz beer vnde schal dat armen notroftighen luden geuen / dor god vnde dor myner sele salicheit willen vortm(er) gheue ik vnde beschede to gheuende tome hilghen gheste den / kranken luden de vp deme bedde lygghen twyntich m(a)rc sund(isch) vortm(er) schalme(n) gheue(n) enen manne vyftich marc / sund(isch) de dor myner sele willen gha to Rome vortm(er) schalme gheue(n) der hilghen yuncvrowen sunte katherinen to / lepelow . teyn m(a)rc sund(isch) vortmer to zuͦnte yuͦriene to exsen teyn m(a)rc . vnde to vlemynghes dorpe teyn marc / vortmer geue ik greteken voghelsanghes myner suster dochter twyntich m(a)rc Sund(isch) vortm(er) gheue ik hermen blanken / vnde wylleken van rauenhorst enem Jewelken vyftich m(a)rc sund(isch) dar scholen se mede kopen houe efte lygghende / grund . de se eren kinderen moghen eruen wan se sodane ghud ghekoft efte ghedinghet hebben so schalme en / gheuen dat gheld vnde nicht eer vortm(er) gheue ik hermen leddeghen kinderen den dren iewelkeme teyn m(a)rc / vortm(er) gheue ik tilseken leddeghen dochter teyn m(a)rc vortm(er) hans kokeschen myner suster gheue ik twintich m(a)rc / vnde thelen hans beckers wÿue teyn m(a)rc . vortmer gheue ik vnde beschede to gheuende greten myner husvrowen / dat halue Erue dar ik myt er vnde se myt my Inne wonet in der monike strate vor eren brutschat wente id / myt ereme brutschatte wart ghekoft . vnde dar to gheue ik eer al vnse varene haue dat kleneste dat medemeste / vnde dat groteste weghelik edder vnbeweghelek . nomelik eder vnbenomelik schult eder vnschult allent dat / vnse is butene efte bynnene behaluen desse vorbenomeden vorgheuene(n) dink . Vortmer alle desse vorscreue(n) dink / wil ik stede . vast vnde vntobroken holden also langhe bet ik de sulue(n) muntliken wedder spreke To vormu(n)dere(n) / desses testamentes kese ik de bescheden lude ghodeke vleghensenggher . Johan langhen . hermen ypersen vnde Johan / vruͦchtenichte borghers tome Sunde . vnde bidde ze dat ze dor god vnde dor myner sele salicheit willen by / dessen vorscreue(n) dinghe(n) willen don alse ik en in ghantzen truwen to loue dyt testament is ge screue(n) vnde geue(n) / tome sunde Na godes bord drutteynhundert iar in deme sosse vnde achtentighesten iare des mandaghes negest / vnser anderen vruwen daghe so se gheboren ward /