Ik her luͦtke p(re)ster vnde bertelt brodere ghenom(et) ghosta(re) wy bekenne(n) vn(de) bethuͦghen ope(n)ba(r)e vor alle / de(n) jene(n) de desse(n) bref ze(n) edder hore(n) lezen dat wy myt wille(n) . myt vuͦlbort vn(de) na rade vns(er) vru(n)t hebbe(n) / vorkoft vn(de) vorkope(n) Jacop karlike vn(de) sine(n) rechte(n) erfname(n) vnses vader erue to baldereke vor hu(n)dert mark / sundisch pen(n)i(n)gh vijf mark my(n) de he vns wol to ener ghantze(n) noͤghe heft betalet eer der makinghe des/ses breues . mit alle siner thobehoringh(e) alze it licht vn(de) gheleghe(n) heft oldinghes an sine(n) schede(n) begrepe(n) Dat / hebbe wy em vn(de) sine(n) erfname(n) ghewaret iar vn(de) dach alze it en recht in deme lande is vn(de) wy vn(de) vnse erf/name(n) willent em vn(de) sine(n) erfname(n) ware(n) na d(e)n dore vor alle p(er)sone(n) ghistlik edder werlik dede vor recht / kome(n) wille(n) alzo vrigh alze it vns vnse vader darghem(ede) gostan vrighest gheeruet vn(de) besete(n) heft vn(de) / wy vn(de) vnse erfname(n) hebbe(n)t em vn(de) sine(n) erfname(n) vorlate(n) vn(de) vorlate(n)t noch in dess(er) scrift alzo ghantz / dat wy vn(de) vnse erfname(n) dar nicht ane beholde(n) schole(n) To thuͦghe to ener witlicheyt vn(de) to ener gro/tere(n) bewaringhe alle dess(er) vorbenomed(en) dink zo hebbe wy hern luͦtke vn(de) bertelt vorgheno(meden) vnse in/ghezeghel(e) ghehe(n)gh(et) vor dessen bref de ghe gheue(n) vn(de) screue(n) is tome sund(e) Na der bort ghodes duse(n)t / iar drehu(n)dert iar in deme neghe(n)tegheste(n) iare des sundaghes to mitvasten /